Heavy Rainfall Across Maharashtra: Latest Developments : राज्यात आता पावासने हळूहळू दमदार आगमन करायला सुरुवात केली आहे. आज सकाळी पावसाने राज्यभरात कमी-जास्त प्रमाणात हजेरी लावल्याचे दिसून आले. तर आता  पुण्याचा घाटमाथा, रायगड साताऱ्याच्या घाटमाथ्यावर जिल्ह्यात उद्या (रविवार) जोरदार पावसाची शक्यता वर्तवण्यात आली आहे. या पार्श्वभूमीवर या भागात दक्षतेचा इशारा (ऑरेंज अलर्ट) देण्यात आला आहे.

तसेच मुंबई, पालघर, ठाणे, रत्नागिरी, सिंधुदुर्ग, नाशिक घाटमाथा, कोल्हापूर घाटमाथा, बुलडाणा, अकोला, अमरावती, चंद्रपूर, गोंदिया, गडचिरोली जिल्ह्यांत जोरदार सरींची शक्यता वर्तवरण्यात आली आहे. याशिवाय वाशीम, नागपूर, वर्धा, यवतमाळ जिल्ह्यांत विजांसह पावसाची शक्यता असल्याने सतर्कतेचा इशारा (येलो अलर्ट) देण्यात आला आहे. याचबरोबर उर्वरित राज्यात ढगाळ हवामानासह हलक्या पावसाची शक्यता असल्याचे सांगण्यात आले आहे.

राज्यात आज(शनिवार) सकाळपर्यंतच्या २४ तासांमध्ये पावसाचा जोर वाढल्याचे दिसून आले. अनेक ठिकाणी अतिवृष्टीची नोंद झाली असून, कोकण, घाटमाथ्यावर २०० मिलिमीटरपेक्षा अधिक पावसाची नोंद झाली. आज सकाळपासूनच राज्यात सर्वदूर पावसाच्या मध्यम ते जोरदार सरी सुरू होत्या. तर कमाल तापमानात घट झाल्याने बहुतांश ठिकाणी पारा ३० अंशांच्या खाली होता. तर, जळगावात राज्यातील उच्चांकी ३१.८अंश सेल्सिअस तापमानाची नोंद झाली.

याचबरोबर गुजरातपासून उत्तर केरळपर्यंत किनारपट्टीला समांतर कमी दाबाचा पट्टा कायम आहे. तर उत्तर छत्तीसगड आणि झारखंड परिसरावर तीव्र कमी दाबाचे क्षेत्र सक्रिय आहे. ही प्रणाली मध्य प्रदेशाकडे येताना हळूहळू निवळून जाण्याचे संकेत आहेत. मॉन्सूनचा आस असलेला कमी दाबाचा पट्टा ग्वाल्हेर, अनुपगड, चुरू, रेवा, तीव्र कमी दाबाचे केंद्र, पुरुलिया,ते पूर्व मध्य बंगालच्या उपसागरापर्यंत सक्रिय आहे.