मुंबई : सध्या राज्यासह मुंबईत दिवाळीचा उत्साह आहे; मात्र प्रवासी नागरिकांची वाढलेली संख्या व बाजारपेठांतील गर्दी यामुळे मुंबईत सक्रिय रुग्णांची संख्या पुन्हा वाढत आहे. त्यामुळे राज्यात सक्रिय रुग्णांच्या यादीत पुण्यालाही मागे टाकून मुंबई पहिल्या क्रमाकांवर आली आहे.

राज्यातील पाच जिल्ह्यांत एकूण सक्रिय रुग्णांपैकी ७६ टक्के सक्रिय रुग्ण केवळ मुंबई, पुणे, नगर, ठाणे आणि रायगड या जिल्ह्यात आहेत. मुंबईत सध्या चार हजार ५०३ सक्रिय रुग्ण आहेत. राज्यातील एकूण सक्रिय रुग्णांमध्ये त्याचे प्रमाण २८.९५ टक्के आहे. त्यापाठोपाठ पुण्यात तीन हजार २१० (२०.६४ टक्के), नगरमध्ये एक हजार ८७१, ठाण्यात एक हजार ६१८ (१०.४० टक्के) आणि रायगडमध्ये ६२३ (४.०१ टक्के) सक्रिय रुग्ण आहेत. दरम्यान, राज्यात सध्या १५ हजार ११९ सक्रिय रुग्ण आहेत. ही संख्या दोन महिन्यांपूर्वी जवळपास दुप्पट होती; मात्र आता एकूण संख्येत घट झाली आहे.

राज्यात २६ ऑगस्ट रोजी ५० हजार ३९३ सक्रिय रुग्ण होते. एक महिन्यानंतर म्हणजेच २६ सप्टेंबर रोजी राज्यात ३७ हजार ८६० सक्रिय रुग्णसंख्या नोंदवली गेली; तर २५ ऑक्टोबर रोजी २३ हजार १८४ सक्रिय रुग्णांची नोंद करण्यात आली. ऑगस्ट, सप्टेंबर, ऑक्टोबर या तिन्ही महिन्यांत मुंबई सक्रिय रुग्णांमध्ये राज्यात दुसऱ्या क्रमांकावर होती; मात्र नोव्हेंबरच्या पहिल्याच आठवड्यात मुंबई पहिल्या क्रमांकावर आली आहे.

खबरदारी घेण्याचे आवाहन

राज्यात दररोज सापडणाऱ्या कोरोना रुग्णांची संख्या आता नियंत्रणात आहे. त्यामुळे आरोग्य विभागावरील ताण कमी असला, तरी दिवाळीच्या पार्श्‍वभूमीवर खबरदारी घेण्याचे आवाहन राज्य सरकारने केले आहे. तसेच नागरिकांनी कोरोनाच्या नियमांचे पालन करावे, यासाठी स्थानिक प्रशासनांनी योग्य ती खबरदारी घ्यावी, अशा सूचनाही राज्य सरकारकडून केल्या आहेत.