उद्धव ठाकरे आणि केंद्रीय मंत्री नारायण राणे यांच्यातील वाद सर्वश्रूत आहे. एकेकाळी शिवसेनेत शब्दाला वजन असलेले राणे बाहेर का पडले, उद्धव आणि राणे यांच्यात नेमका काय वाद झाला याबाबत अजूनही उत्सुकता आहे. अशातच राज्यात शिंदे फडणवीस सरकार स्थापन झाल्यानंतर दोघांमधील वाद विकोपाला गेलाय. अशातच, नारायण राणे यांनी ठाकरेंना मासे खाण्याचं आमंत्रण दिलं आहे. त्यामुळे ठाकरे हे आमंत्रण स्विकारतात का ? याकडे सर्वांचे लक्ष वेधले आहे. (Maharashtra Politics Narayan Rane Thackeray invitation to eat fish)

झी मराठी वाहिनीवरील 'खुपते तिथे गुप्ते' या कार्यक्रमात केंद्रीय मंत्री नारायण राणे सहभागी झाले होते. गुप्तेंच्या शोमध्ये जादूचा फोन हा प्रेक्षकांमध्ये लोकप्रिय आहे. या फोनवरुन पाहुणे स्थळ-काळाच्या बंधनाविना अगदी कोणालाही फोन करु शकतात.

हीच संधी साधत नारायण राणे यांनी थेट उद्धव ठाकरेंना फोन केला. यावेळी त्यांनी त्यांच्याशी संवाद साधताना मासे खाण्याचं आमंत्रण दिले.

नेमकं काय म्हणाले राणे?

जय महाराष्ट्र उद्धव साहेब, नारायण राणे बोलतोय. तब्येत कशी आहे? बरी आहे ना? कोकणात येऊन तुम्ही रत्नागिरीतील बारसू रिफायनरी प्रकल्पाला विरोध केलात. पण तुम्हाला माहित असेल, तर शिवसेनेच्या स्थापनेपासून कोकणी माणसाची साथ लाभली आहे. कोकणातून आलेल्या माणसांनी शिवसेना वाढवली, किंबहुना आजही वाढवत आहेत, असं नारायण राणे म्हणाले.

बारसू रिफायनरी प्रकल्प कोकणच्या विकासासाठी आवश्यक आहे. त्यामुळे या प्रकल्पाला विरोध नको, सहकार्य करा. तुम्ही बाळासाहेबांचे चिरंजीव आहात. कोकणाने बाळासाहेबांना प्रेम आणि विश्वास दिला. तुम्ही त्यापैकी एक तरी द्या. कोकणात मासे खायला या, पण विरोध करायला नको, असं आवाहन नारायण राणे यांनी केलं.