राज्यात मागील काही दिवसांपासून पावसाने अनेक जिल्ह्यांत पावसाने विश्रांती घेतली आहे. दरम्यान राज्यात काही ठिकाणी अतिवृष्टी तर काही ठिकाण पुरेसा पाऊस न झाल्याचे पाहायला मिळाले. राज्यात अनेक जिल्ह्यात सरासरीपेक्षाही कमी पाऊस झाल्याने शेतकऱ्यांची चिंता वाढली असून दुबार पेरणीचं संकट ओढावण्याची शक्यता आहे. राज्यात पुढील काही दिवस पावसाची स्थिती काय असेल? चला जाणून घेऊया.

विदर्भ आणि मराठवाड्यात मागील काही दिवसांपासून पावसाने विश्रांती घेतल्याचे पाहायला मिळत आहेत. काही दिवसांपूर्वी विदर्भात अतिवृष्टी झाल्याचे पाहयला मिळाले होते. अनेक गावे पाण्याखाली गेल्यानंतर आता मागील सात दिवसांपासून पावसाने उघडीप घेतली आहे. याचा फटका सोयाबीन पिकाला बसण्याची शक्यता आहे. सध्या पिकाला पावसाची गरज असून फुलोऱ्यात आलेलं सोयाबीन पिक पावसावाचून वाया जाण्याची शक्यता आहे. तसेच यामुळे शेतकऱ्यांवर दुबार पेरणीचं संकट देखील ओढावण्याची शक्यता आहे.

११ ऑगस्ट रोजी हवामान विभागाने दिलेल्या माहितीनुसार, मराठवाडा भागात पावसाचे प्रमाण गेल्या १०-१२ दिवसात अल्प आहे. तसेच महाराष्ट्रात १८ ते २४ ऑगस्ट दरम्यान विदर्भ व सलग्न मराठवाड्यातील जिल्ह्यांत काही ठिकाणी पावसाची शक्यता आहे.

तसेच २५ ते ३१ ऑगस्ट या काळात, विदर्भ, कोकण येथे पावसाची शक्यता आहे. मध्य महाराष्ट्र, मराठवाडा येथे सरासरी इतका किंवा कमी पाऊस होण्याची शक्यता आहे. मात्र राज्यात मोठ्या पावसाची शक्यता कमी असल्याचे हवामान विभागाकडून सांगण्यात आले आहे.

पुढील ७ दिवसांत मध्य (महाराष्ट्रसहीत), पश्चिम आणि दक्षिण भारतात या भागांमध्ये पावसाची शक्यता कमी असल्याची माहिती देखील हवामान विभागाने दिली आहे.