दिवाळीनिमित्त दरवर्षीप्रमाणे यंदाही एसटी महामंडळाने १० टक्के भाडेवाढीचा निर्णय घेतला. मंगळवारपासून (ता. ७) ही दरवाढ लागू होणार असून, २७ नोव्हेंबरपर्यंत असणार आहे. या नवीन दरानुसार आता छत्रपती संभाजीनगर ते पुणे हे प्रवास भाडे ५५५ तर छत्रपती संभाजीनगर ते मुंबई हे भाडे ९१५ रुपये असणार आहे.

राज्यात गेल्या काही दिवसांत पेट्रोल, डिझेल आणि गॅसच्या दरात वाढ झाल्याने सर्वसामान्य लोक हैराण झाले आहेत. त्यानंतर आता त्यामध्ये आणखी एका दरवाढीची भर पडली आहे. एसटी महामंडळाच्या राज्य परिवहन प्राधिकरणाने ऐन दिवाळीच्या गर्दी हंगामात १० टक्के भाडेवाढ केली आहे.

त्यामुळे छत्रपती संभाजीनगरातून पुणे-मुंबईला जाण्यासाठी साध्या बससह शिवशाहीने जाण्यासाठी ५० ते १०० रुपये अधिकचे मोजावे लागणार आहेत. ही दरवाढ साधी, जलद, निमआराम, साधी शयन आसनी, वातानुकूलित शिवाई, शिवशाही या बससाठी करण्यात आली आहे. दरवाढीतून अश्वमेध व शिवनेरीला वगळण्यात आले असून, या बसला पूर्वीचेच दर राहणार आहेत.

खासगी बसने वाढवले भाडे

खासगी बसच्या भाड्यातही तब्बल दीडपट वाढ झाली आहे. त्यामुळे ट्रॅव्हल्स कंपन्यांची दिवाळी साजरी होणार आहे; तर प्रवाशांचे दिवाळे निघणार आहे. खासगी बसच्या तुलनेत एसटी बसची तिकीट दरवाढ कमी आहे. शिवाय महिलांना पन्नास टक्के सूट तर ७५ वर्षांवरील ज्येष्ठांना मोफत प्रवास याही एसटीच्या सुविधा आहेत.

अशी झाली दरवाढ

ठिकाण -जुने दर- नवे दर

पुणे- ५०५- ५५५

मुंबई -७८५ -८६५

नागपूर- १०१० -११११

नाशिक -४४५ -४८५