मुंबई : कोरोनामुळे लावण्यात आलेल्या निर्बंधात शिथिलता आणताना लसीचे दोन डोस घेणे सक्तीचे करण्यावर मुख्यमंत्र्यांसोबत झालेल्या बैठकीत चर्चा झाल्याचे समजते. हॉटेल, मॉल आणि प्रार्थना स्थळांवरील निर्बंध उठविताना काही बंधने देखील घालण्यात यावी, यावर टास्क फोर्समधील सदस्यांचे एकमत होते. तिसरी लाट आली तर तातडीने निर्बंध आणण्यासाठी कोणते निकष असायला हवेत, याविषयी सविस्तर नियमावली तयार करण्याचे आदेश मुख्यमंत्र्यांनी दिले.

टास्क फोर्सच्या आजच्या बैठकीत संभाव्य तिसरी लाट, ऑक्सिजनची लागणारी गरज, लसीकरणाचा वेग वाढवणे, ट्रेसिंग, ट्रेकिंग वाढवणे, तसेच येणाऱ्या काळात आणखीही काही क्षेत्रांच्या बाबत सावधानता बाळगून, कशा प्रकारे निर्बंधात शिथिलता आणायची यावर चर्चा झाली. आजच्या बैठकीतील सूचनांच्या अनुषंगाने टास्क फोर्स नियमावली तयार करीत आहे.

या बैठकीत मुख्यमंत्री उद्धव ठाकरे यांनी मार्गदर्शन केले. यावेळी मुख्य सचिव सीताराम कुंटे, डॉ. संजय ओक, डॉ. शशांक जोशी, मेहुल मेहता, डॉ. झहीर विराणी, डॉ. राहुल पंडित, वसंत नागवेकर, डॉ. सुहास प्रभू, डॉ. अजित देसाई, अतिरिक्त मुख्य सचिव (आरोग्य) डॉ. प्रदीप व्यास उपस्थित होते.

15 ऑगस्टपासून मुंबई लोकल होणार सुरू

मुंबईची लाईफलाईन 15 ऑगस्टपासून सुरु होणार आहे. मुख्यमंत्री उद्धव ठाकरे यांनी 15 ऑगस्टपासून लोकल सुरू करण्यात येणार असल्याची घोषणा केली. कोरोना लसीचे दोन डोस घेतलेल्या नागरिकांना लोकलमधून प्रवास करता येणार आहे, असंही मुख्यमंत्र्यांनी जाहीर केलं.