Maratha Reservation : उपोषणानंतर १२ दिवस रुग्णालयात उपचार घेतल्यानंतर मराठा आरक्षण लढ्याचे नेते मनोज जरांगे पाटील यांनी मंगळवारी आंतरवाली सराटीमध्ये जात आपली भूमिका स्पष्ट केलं.

मनोज जरांगे पाटील यांचं उपोषण सुटल्यानंतर ओबीसी समूहाच्या वतीने लक्ष्मण हाके यांनी उपोषणाचं हत्यार उपसलं होतं. सगेसोसोयऱ्याची अंमलबजावणी करु नये, कुणबी प्रमाणपत्रांची तपासणी करावी, जात प्रमाणपत्र आधार कार्डला जोडावं, अशा मागण्या करण्यात आलेल्या होत्या.

लक्ष्मण हाकेंच्या उपोषणाला राज्यातल्या जवळपास सगळ्याच ओबीसी नेत्यांनी समर्थन दिलं. छगन भुजबळ, पंकजा मुंडे, धनंजय मुंडे, विजय वडेट्टीवार, गोपीचंद पडळकर यांच्यासह अनेक ओबीसी नेत्यांनी ओबीसी आंदोलनाला पाठिंबा दिला आहे.

मंगळवारी आंतरवाली सराटी इथं झालेल्या सभेमध्ये मनोज जरांगे पाटील यांनी छगन भुजबळ यांना इशारा दिला. जरांगे पाटील म्हणाले की, छगन भुजबळ यांना राज्यामध्ये मराठा-ओबीसी दंगल पेटवायची आहे. परंतु आपण शांत राहून गावखेड्यातले आपले संबंध बिघडू द्यायचे नाहीत.

जरांगे पुढे म्हणाले की, आंतरवाली सराटीमध्ये सगळा समाज आपला आहे. तो येवल्याहून येऊन आपल्यात दुही निर्माण करेल.. त्यामुळे आपल्याला एक होऊन राहावं लागेल.. भाऊ तुझा इंगाच जिरवतो, बेट्या तुझा टांगा पलटवणार... असं म्हणत जरांगेंनी छगन भुजबळांना इशारा दिला.

दरम्यान, येणाऱ्या विधानसभेच्या निवडणुका लढवणार असल्याचं यापूर्वी जरांगेंनी स्पष्ट केलं होतं. आता त्यांनी थोडी सावध भूमिका घेत १३ तारखेला याबाबत निर्णय घेणार असल्याचं म्हटलं आहे. २८८ जागा लढायच्या की पाडायच्या, याचा निर्णय घेणार असल्याचं त्यांनी सांगितलं. त्यामुळे १३ तारखेपर्यंत सरकार सगेसोयऱ्याचा कायदा करणार का? असा प्रश्न उपस्थित होत आहे.