कोल्हापूर : ‘राष्ट्रवादी काँग्रेसमध्ये जितेंद्र आव्हाड (Jitendra Awhad) यांना कोणीही विचारत नाही. ते एकाकी पडल्याने काहीही बोलत आहेत, त्यांची बुद्धी ठिकाणावर नाही’, अशा शब्दांत वैद्यकीय शिक्षणमंत्री व पालकमंत्री हसन मुश्रीफ (Hasan Mushrif) यांनी आव्हाड यांच्यावर हल्लाबोल केला. आव्हाड यांच्यावर एकेरी शब्दात टीका करून त्यांनी आपली भूमिका स्पष्ट केली.

‘मुश्रीफ यांना भाजपसोबत जायचे नव्हते, तसा फोन त्यांनी मला केला होता’, असा दावा आव्हाड यांनी काल केला होता. यावर मुश्रीफ यांची प्रतिक्रिया विचारल्यावर ते बोलत होते.

मुश्रीफ म्हणाले,‘आव्हाड यांना पक्षात कोणी विचारत नाही. त्यामुळे ते एकाकी पडले आहेत. पहिल्यांदा आमची सत्ता गेली तेव्हा भारतीय जनता पार्टी व शिंदे गटासोबत आपण जावे यासाठी आव्हाड यांनीच पुढाकार घेतला होता. त्यावेळी आमदारांनी सह्या केल्या त्यावर आव्हाड यांची सही एक नंबरला आहे. पण आता आम्ही भाजपसोबत जायचे ठरवले, त्यावेळच्या चर्चेत आव्हाड नव्हतेच. माझा भाजपसोबत जायच्या निर्णयाला विरोध असता तर मी मंत्रीपदाची शपथ घेतली असती का?’