मुंबई : भाजपचे नेते आणि केंद्रीय मंत्री नारायण राणे (Union Minister Narayan Rane) यांनी आज मुंबईत पत्रकार परिषद घेतली. सध्या शिवसेना आणि भाजप (Shiv Sena vs BJP) नेत्यांकडून एकमेकांवर सुरू असलेले आरोप-प्रत्यारोप, तसेच बीएमसीकडून (BMC) त्यांच्या बंगल्याच्या तपासणीसाठी आलेल्या नोटीसवर नारायण राणेंनी भाष्य केलं. यावेळी त्यांनी आमदार नितेश राणेंच्या (Nitesh Rane) कलाकारीचं देखील तोंडभरुन कौतुक केलं.

पत्रकार परिषदेत नारायण राणेंनी शिवसेना पक्षप्रमुख आणि मुख्यमंत्री उद्धव ठाकरे (Uddhav Thackeray) व आदित्य ठाकरे (Aditya Thackeray) यांच्यावरही निशाणा साधलाय. ते म्हणाले, नितेशवर एक कारवाई म्याँव-म्याँवची आहे. म्याँव-म्याँव कोण आहे हे माहीत नाही. वाघ जाऊन मांजरं कशी आली हे मला कळलं नाही. स्वत:ला वाघ बोलणारे मांजर कसे झाले हे समजलं नाही. स्वत:ला वाघ म्हणणारे मांजरीच्या आवाजानं.. का असं झालं कळलं नाही. नितेश एक कलाकार बनतोय याचं समाधान आहे. मांजरीचा आवाज काढलाय त्यानं, त्याच्यातला कलावंत उमगला, असं सांगत राणेंनी नितेश यांचं कौतुक केलंय.

हिवाळी अधिवेशनात (Winter Session) नितेश राणे यांनी विधिमंडळाच्या पायऱ्यांवर भाजपचे आंदोलन (BJP) सुरु असताना आदित्य ठाकरे यांना डिवचलं होतं. हे आंदोलन सुरु असताना आदित्य ठाकरे विधिमंडळात प्रवेश करत होते. त्यावेळी नितेश राणे यांनी म्याँव-म्याँव, असा आवाज काढून आदित्य ठाकरे यांची खिल्ली उडविली होती. विशेष म्हणजे, नितेश राणे यांनी प्रसारमाध्यमांसमोर जाहीरपणे आपल्या या कृतीचं समर्थनही केलं होतं. त्यानंतर महाविकासआघाडी सरकारकडून नितेश राणे यांच्याविरुद्ध पद्धतशीरपणे चक्रे फिरायला सुरुवात झाली होती. सुरुवातीला महाविकासआघाडीच्या नेत्यांनी आदित्य ठाकरे यांची खिल्ली उडवल्याप्रकरणी नितेश राणे यांच्या निलंबनाची मागणी लावून धरली. तर दुसरीकडं कणकवली पोलिसांनी (Kankavli Police) संतोष परब प्रकरणात (Santosh Parab Case) चौकशीचा फास आवळायला सुरुवात केली. पोलिसांनी पद्धतशीरपणे व्यूहरचना करत नितेश राणे यांच्याविरोधात पुरावे गोळा करुन त्यांची कोंडी केली होती.