नागपूर : राज्यातील नव्या सरकारचा मंत्रिमंडळ विस्तार झाल्यानंतर मंत्री संजय राठोड पहिल्यांदाच आपल्या मतदारसंघात पोहोचले आहेत. यावेळी त्यांचे नागपूरात जंगी स्वागत करण्यात आले असून त्यांच्यावरील आरोपावर बोलताना त्यांनी टीका करणाऱ्याला चांगलंच फटकारलं आहे.

(Sanjay Rathod News)

दरम्यान, तुमच्यावर आरोप असतानाही तुम्हाला परत मंत्रिपद मिळालं यावर बोलताना ते म्हणाले की, "माझ्यावर आरोप होते त्यावर मी निष्पक्षपणे राजीनामा दिला, त्यावर पोलीस चौकशी झाली, कारवाई झाली पण न्यायालयाने माझ्याबद्दल आता निकाल दिला आहे. यानंतर या संदर्भात जो कुणी माझी बदनामी करेल त्याला मी कायदेशीर उत्तर देणार आहे." असं संजय राठोड बोलताना म्हणाले आहेत.

उद्धव ठाकरेंबद्दल जे ट्वीट संजय शिरसाठ यांच्याकडून पडलं होतं, ते चुकून पडलं असल्याचं स्पष्टीकरण देत उद्धव ठाकरेंबद्दल आम्हाला आदर आहे असं संजय राठोड म्हणाले आहेत. खातेपाटप आणि जिल्ह्यांच्या पालकमंत्रिपदी निवड लवकरच करण्यात येणार आहे, त्याचबरोबर कुणाला कोणतं मंत्रिपद दिलं जाईल ते मुख्यमंत्री ठरवतील असं त्यांनी सांगितलं.

मतदारसंघात पावसामुळे जे काही नुकसान झाली आहे त्याचा मी आढावा घेणार आहे. दरम्यान नुकसानीची आकडेवारी पुढे आली की लगेच मदतीला सुरूवात केली जाणार आहे. शेतकऱ्यांना केंद्रबिंदू मानून हे सरकार काम करत आहे. महाराष्ट्रातील शेतकरी, कामगार, मजूर अशा सर्वांसाठी सरकारला काम करायचं असल्याचं त्यांनी सांगितलं आहे.

आज मी मंत्री झाल्यानंतर पहिल्यांदा माझ्या मतदारसंघात जाणार असून सुरूवातीला पोहरादेवीच्या दर्शनाला जाणार आहे. त्यानंतर माझ्या जिल्ह्यात फिरणार असल्याचं त्यांनी सांगितलं आहे. दरम्यान माझ्यावर जे आरोप होते त्यासंदर्भात आता जे कोण परत आरोप करेल त्याला मी कायदेशीर उत्तर देईल असं ते म्हणाले आहेत.