मुंबई: राज्याचे परिवहन मंत्री (Transport minister) आणि शिवसेना नेते अनिल परब (Anil parab) आज ईडीसमोर चौकशीसाठी हजर झाले आहेत. ईडीने त्यांना दुसरं समन्स बजावल्यानंतर अनिल परब हजर राहिले. चौकशीला निघत असताना त्यांनी माध्यमांशी संवाद साधला. "मला ईडीचं (ED) दुसर समन्स (Summons) मिळालं आहे. मी आता चौकशीला जात आहे. मी शिवसेनाप्रमुखांची, माझ्या मुलींची शपथ घेऊन सांगेन की, मी काहीही चुकीचं काम केलेलं नाही" असं अनिल परब म्हणाले.

अनिल परब यांच्या या विधानावर कणकवलीचे आमदार नितेश राणे यांनी त्यांना टोला लगावला आहे. नितेश राणे केंद्रीय मंत्री नारायण राणे यांचे सुपूत्र आहेत. "स्वर्गीय शिवसेनाप्रमुखांपेक्षा, आताच्या पक्षप्रमुखांची शप्पथ घेतली असती, तर परबांवर अजुन विश्वास बसला असता" असा टोला नितेश राणेंनी लगावला आहे.

मध्यंतरी केंद्रीय मंत्री नारायण राणे यांच्या अटकेमध्ये अनिल परब महत्त्वाची भूमिका बजावत असल्याचे एका व्हिडीओमधून दिसले होते. तेव्हापासूनच, अनिल परब यांना टार्गेट करण्यात येईल, अशी चर्चा होती.

नेमक काय म्हणाले अनिल परब

"ईडीने नेमकी कशासाठी नोटीस बजावलीय, ते आपल्याला माहित नाही" असे अनिल परब यांनी सांगितले. "मी चौकशीला पूर्ण सहकार्य करीन. मला का बोलावलय ते अजूनही माहित नाही. मी चौकशीला तिथे गेल्यानंतरच समजेल. आज चौकशीला बोलावलं आहे. माझ्याकडून कुठलीही चूक झालेली नाही" असे त्यांनी सांगितले.