मुंबई : मागील काही वर्षांपासून आरे येथील मेट्रो कारशेडबाबत वाद सुरू आहे, फडणवीस सरकराच्या काळात झालेल्या या निर्णयाला सर्व स्तरातून जोरदार विरोध करण्यात आला होता, शिवसेनेने विरोध केला आणि मविआ सरकारच्या काळात हे काम थांबवण्यात आलं. मात्र राज्यात महाविकास आघाडीचे सरकार कोसळलं आणि नव्या सरकारकडून पहिल्याच मंत्रिमंडळ बैठकीत आधीच्या सरकारचा आरे मेट्रो कारशेडचा निर्णय बदलण्यात आला, उपमुख्यमंत्री देवेंद्र फडणवीस यांनी मेट्रो कारशेड आरेतच होणार असे संकेत दिले. दरम्यान या आरे कारशेडच्या बाबतीत शिवसेना नेते आदित्य ठाकरे आणि त्यांचे बंधु तसेच मनसेचे नेते अमित ठाकरे यांचं एकमत झाल्याचं दिसून येत आहे.

शिवसेना नेते आदित्य ठाकरे यांनी आरे जंगलात मेट्रो कारशेड उभारण्याला सुरुवातीपासून पर्यावरणवादी गटाची बाजू घेत, आरे येथील कारशेडचा निर्णयाविरोधातील भूमिकेला पाठिंबा दिला होता. आता या लढाईत अमित ठाकरे देखील उतरले आहेत, त्यांनी नव्या मुख्यमंत्री आणि उपमुख्यमंत्र्यांनी आरे कारशेडबाबत पुनर्विचार करावा असे आवाहन करत सोशल मिडीयावर पोस्ट लिहिली आहे.

अमित ठाकरे यांनी फेसबुकवर लिहीलेल्या पोस्टमध्ये म्हटले आहे, ज्यमध्ये त्यांना मेट्रो कारशेड आरे जंगलातच करण्याचा नव्या सरकारने घेतलेला निर्णय माझ्यासारख्या असंख्य पर्यावरणप्रेमींसाठी धक्कादायक आहे, असे अमित ठाकरे म्हणाले आहेत. पुढे त्यांनी "आरेमध्ये कार शेड होऊ नये म्हणून शेकडो तरूण-तरूणींनी संघर्ष केला होता. काहींना तर पोलिसांनी गजाआड टाकलं होत.." असेही अमित ठाकरे म्हणाले आहेत.

विकास हवा पण पर्यावरण उद्ध्वस्त करून नको असे, सांगताना अमित ठाकरे म्हणाले आहेत की, "आपल्याला विकास हवाच आहे, पण पर्यावरणाचा बळी देऊन नको. आपलं पर्यावरण उद्धवस्त झालं तर भविष्यात राजकारण करायला माणूस नावाचा प्राणी शिल्लकच राहाणार नाही, याचं भान सर्व राजकीय नेत्यांनी बाळगायला हवं."

अमित ठाकरे यांनी नुकतेच सत्तेत आलेले मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांना आवाहन करत, "नवे मुख्यमंत्री आणि नवे उपमुख्यमंत्री यांनी आरेतील मेट्रो कारशेडबाबतच्या आपल्या निर्णयाचा पुनर्विचार करावा, ही आग्रहाची विनंती" असे म्हटले आहे.