राज ठाकरे (Raj Thackeray) यांनी गुढीपाडव्याच्या निमित्ताने शिवाजी पार्कवर केलेल्या भाषणात मशीदीच्या समोर भोंगे लावल्यास हनुमान चालिसा लावा, असे आदेश दिल्यानंतर राज्यभरात याचे पडसाद उमटले आहेत. दरम्यान मस्जिद वर लागलेले अवैध भोंगे काढण्याचे निवेदन मनसे सरचिटणीस हेमंत गडकरी (Hemant Gadkari) यांच्या नेतृत्वात नागपूर (Nagpur) पोलिस आयुक्तांना देण्यात आले आहे.

हायकोर्टच्या आदेशच पालन करत हे भोंगे काढण्यात यावे असे या निवेदनात म्हटलं आहे. तसेच हनुमान चालिसा पठण आम्ही मंदिरात करू. मात्र त्या समोर मस्जिद असेल तर, आम्ही काही करू शकत नाही असेही निवेदनात म्हटलं आहे.

राज ठाकरे यांनी गुढीपाडव्याच्या निमित्ताने शिवाजी पार्कवर केलेल्या भाषणाची जोरदार चर्चा झाली. राज ठाकरेंनी 'यू टर्न' घेतला असा टीकेचा सूर उमटला आहे. मशीदीच्या समोर भोंगे लावल्यास हनुमान चालिसा लावा, असे आदेश ठाकरेंनी दिले. यानंतर राज्यात धार्मिक द्वेष वाढीस लागत असल्याचं बोललं जातंय.

मुंबईच्या कुर्ल्यात मनसे कार्यकर्ते मशिदींसमोर हनुमान चालिसा पठन करणार असल्याचं म्हटलं जातय. काही ठिकाणचे भोंगे देखील उतरवण्याची तयारी सुरू आहे. अनेक ठिकाणी मनसैनिक आक्रमक झाले आहेत. मात्र, पुण्यात काही मनसैनिकांमध्ये नाराजीचं वातावरण आहे. पुण्याचे शहराध्यक्ष वसंत मोरे यांनी माझ्या प्रभागात शांतता हवी असल्याने असं कोणतंही पाऊल उचलणार नसल्याचं म्हटलं आहे.