मुंबई : आगामी लोकसभा निवडणूक न लढविण्याचा निर्णय महाराष्ट्र नवनिर्माण सेनेने (मनसे) आज (रविवार) जाहीर केला. तसेच त्यांनी यावेळी बाकी 19 मार्चला बोलू असेही स्पष्ट केले आहे.

मनसे नेते शिरीष सावंत यांनी आज पत्रक प्रसिद्ध करत मनसेची भूमिका स्पष्ट केली. या पत्रकात त्यांनी मनसे यंदाची लोकसभा निवडणूक लढविणार नसल्याचे म्हटले आहे. काँग्रेस, राष्ट्रवादी कॉंग्रेसने काही ठिकाणच्या उमेदवारांच्या याद्या जाहीर केल्या असून, युतीची यादीही लवकरच घोषित होणार आहे. मात्र राज्यातील समीकरणे बदलवण्याची ताकद असणाऱ्या महाराष्ट्र नवनिर्माण सेनेने आपली भूमिका स्पष्ट केल्याने आघाडीला मनसे मदत करणार असल्याचे बोलले जात आहे.

राज्यात शिवसेना-भाजपची युती झाल्यानंतर कॉंग्रेस आघाडीसोबत मनसेचा समझोता होईल, अशी चर्चा होती. यासाठी राष्ट्रवादी कॉंग्रेस अनुकूल होती; मात्र कॉंग्रेसने विरोध केला होता. दरम्यान, पक्षाध्यक्ष राज ठाकरे यांनी 9 मार्च रोजी झालेल्या पक्षाच्या वर्धापन दिनानिमित्त आयोजित मेळाव्यात नंतर भूमिका जाहीर करणार असल्याचे सांगितले होते. राज ठाकरे यांनी शरद पवार यांची भेटही घेतली होती. तसेच राष्ट्रवादी कॉंग्रेसचे नेते अजित पवार, छगन भुजबळ यांनी राज यांची भेट घेतली होती.