शिवसेना नेते आणि राज्याचे नगरविकास मंत्री एकनाथ शिंदे यांचं बंड आता अधिक तीव्र झाले आहे. एकनाथ शिंदे यांनी केलेल्या बंडानंतर शिवसेना आणि महाविकास आघाडी सरकार दोन्ही अडचणीत सापडले आहे. शिवसेनेचे ३५ नव्हे तर ४० आमदार आपल्यासोबत असल्याची प्रतिक्रिया एकनाथ शिंदे यांनी दिली आहे. या आमदारांना काल रात्री उशिरा आसाममधल्या गुवाहाटी इथं नेण्यात आलं आहे. यादरम्यान शिवसेना पक्षाध्यक्ष उद्धव ठाकरे यांनी फेसबुक लाईव्हच्या माध्यमातून जनतेशी संवाद साधला. त्यावर मनसेचे संदीप देशपांडेने मुख्यमंत्र्यांना टोमणा मारला आहे. (MNS sandip deshpande on cm uddhav thackeray)

नुकतेच उद्धव ठाकरे यांनी फेसबुक लाईव्हच्या माध्यमातून जनतेशी संवाद साधला. यामध्ये उद्धव ठाकरे राजीनाम्याबाबत काय बोलणार याकडे सर्वांचं लक्ष लागले होते. याबाबत मुख्यमंत्री उद्धव ठाकरे यांनी भाष्य केलंय. ते म्हणाले की, मी मुख्यमंत्रीपद सोडायला तयार आहे. पण उद्धव ठाकरे CM पदी नको हे समोर येऊन सांगावं, असं त्यांनी बंड करणाऱ्या आमदारांना सांगितलं आहे. त्यावर संदीप देशपांडेने ट्विट करत लिहिले की, "चाळीसच्या वर आमदार सोडून गेले, त्या विरोधात कुठे ही शिवसैनिकांमध्ये उद्रेक नाही अजून किती स्पष्ट सांगायचं. पूर्वी राजा वेषांतर करून स्वतःबद्दल ची मत जाणून घ्यायचे, एकदा तसं करून बघा जनतेच्या भावना नक्की समजतील, मराठी माणूस भावनिक आहे पण मूर्ख नाही."