मुंबई - मागील दोन दिवसांपासून अजित पवार यांच्याकडून आमदारांना देण्यात आलेल्या निधीची चर्चा राज्याच्या राजकारणात रंगली आहे. मात्र अजित पवार यांनी केवळ राष्ट्रवादी काँग्रेसच्याच आमदारांना निधी दिल्याचे आरोप होत आहेत. निधीचाच मुद्दा धरून ठाकरे गटाचे नेते अनिल परब यांनी उपमुख्यमंत्री अजित पवार आणि उपमुख्यमंत्री देवेंद्र फडणवीस यांच्याकडे अजब मागणी केली आहे.

दोन दिवसांपूर्वी अजित पवार आणि देवेंद्र फडणवीस यांचा वाढदिवस झाला. दोघांचा वाढदिवस एकाच दिवशी साजरा करण्यात आला. वाढदिवसानिमित्त दोघांना सर्व स्तरातून शुभेच्छा मिळाल्या.

सध्या विधानसभेचं अधिवेशन सुरू आहे. अधिवेशनातही निधीचा मुद्दा गाजत आहे. निधी आणि वाढदिवसाचे निमित्त साधून अनिल परबांनी दोन्ही उपमुख्यमंत्र्यांकडे निधीची मागणी केली.

अनिल पराब म्हणाले की, देवेंद्र फडणवीस व अजित पवार याचा वाढदिवस होता. मात्र काही कारणास्तव दोघांनीही वाढदिवस साजरा केला नाही. मी संपूर्ण सभागृहाच्या वतीने त्यांना वाढदिवसाच्या शुभेच्छा देतो. दोघंही उपस्थित आहेत. आता आम्हा सर्वांना रिटर्न गिफ्ट म्हणून योग्य तो निधी द्यावा अशी अजब मागणी परब यांनी फडणवीस आणि अजित पवार यांच्याकडे केली आहे.

दरम्यान अजित पवारांकडून देण्यात आलेल्या निधीवर शिंदे गटातील आमदारांकडूनही समाधान व्यक्त करण्यात आले आहे. आमदार भरत गोगावले यांनी याची कबुली दिली. युतीत काहीही मतभेद नसल्याचं गोगावले यांनी सांगितलं.