Monsoon Session:  विधान परिषदेचे विरोधी पक्षनेते अंबादास दानवे यांनी अधिवेशनापूर्वी माध्यमांशी संवाद साधला. यावेळी त्यांनी  भाजपने सोमय्यांवर कारवाई करावी, अशी मागणी केली. अंबादास दानवे यांनी काल विधान परिषदेत हा मुद्दा चांगलाचा गाजवला. त्यांनी याबाबत उपसभापतींकडे पुरावे दिले आहेत.

अंबादास दानवे म्हणाले, किरीट सोमय्या यांचा पेनड्राईव्ह दिलेला आहे. उपसभापती तपासणी करतील. मला अनेकांनी हे पेनड्राईव्ह मागितले पण मी देणार नाही. भाजपने आतापर्यंत दुसरा कोणी कार्यकर्ता किंवा नेता असता तर त्याला निलंबित केले असते. पण भाजपने किरीट सोमय्यांवर कोणतीही कारवाई केली नाही. पोलीस चौकशी करतील. मात्र धर्म मानणाऱ्या भाजपने सोमय्यांवर कारवाई केली पाहीजे.

राज्यात महिला अत्याचार वाढत आहेत. सरकार गुन्हेगारांना मोकाट सोडत आहे. राज्य गुन्हेगारीच्या घटनांमध्ये पहिल्या क्रमांकावर येत आहे, असे देखील दानवे म्हणाले. 

राज्यातील राजकारणाचा स्तर घसरला आहे, यावर अंबादास दानवे म्हणाले, राजकारणाचा स्तर कोणी घसरवला, हे पाहण्याची गरज आहे. कुणाचीही वैयक्तिक लढाई होऊ नये, वैचारिक लढाई व्हावी. मात्र मागचे काही दिवस बघितले तर विचारांची लढाई आता वैयक्तिक होत आहे. सर्व राजकीय पक्ष याला जबाबदार आहेत, असे दानवे म्हणाले. 

पावसाळी अधिवेशनाचा आज तिसरा दिवस आहे. आज विरोधक सोमय्या प्रकरण, राज्यातील वाढते महिला अत्याचार यावर प्रश्न उपस्थित करणार आहेत. काल सोमय्या प्रकरणावर सभागृहात गोंधळ झाला. या प्रकरणात गृहमंत्री देवेंद्र फडणवीस यांनी चौकशीचे आदेश दिले आहेत.