मुंबई: "शिवसेना (shivsena) विरोध करण्यापलीकडे काय करु शकते. शिवसेनेला कितीही विरोध करु दे, शिवसेनेला कधीच भीक घातली नाही. २५-३० शिवसैनिक झेंडे घेऊन घराबाहेर येणं, याला विरोध म्हणत नाही. ही चिंपाट गिरी आहे, मुंबईच्या (Mumbai) भाषेत लुक्के गिरी झाली. आताचे जे सैनिक आहेत, त्यांना शिवसेना कळलेली नाही" अशा शब्दात नारायण राणेंचे (narayan rane) पुत्र आणि माजी खासदार निलेश राणे (nilesh rane) यांनी शिवसेनेवर टीका केली आहे.

"राजकारणात एक अलिखित करार असतो. तुम्ही माझ्या घरावर जायचं नाही. मी तुमच्या घरावर जाणार नाही. तो करार त्यांनी मोडला. त्याचे जे काही परिणाम आहेत, ते त्यांना भोगावे लागतील" असा इशारा निलेश राणेंनी दिला. केंद्रीय मंत्री नारायण राणेंची जनआशीर्वाद यात्रा आता सिंधुदुर्गात पोहोचली आहे. तिथे मनाई आणि जमावबंदीचा आदेश आहे, त्या संदर्भात विचारलेल्या प्रश्नावर निलेश राणे म्हणाले की, "शिवसेना राणेंना घाबरते. शिवसेना सोडली तेव्हापासूनच आमच्याबद्दलची भीती शिवसेनेच्या मनात आहे. यात्रेला जो प्रतिसाद मिळतोय, ते पाहून शिवसेनेला भीती वाटणं सहाजिक आहे"

"चार दिवसात ६० केसेस टाकल्या. मेट्रोला हे झेंडे दाखवतात, तेव्हा हजारोची गर्दी होते. पण एकावरही केस होत नाही. परवा आमच्या घरावर १००-१५० शिवसैनिक आले. वरुण सरदेसाई आणि अन्य काही जणांचा सत्कार उद्धव ठाकरेंनी त्यासाठी केला. त्या एकाचही नाव एफआयआरमध्ये नाहीय. सामान्य शिवसैनिकाचं नाव आहे. बड्या बापाची ही मुलं मागे राहून तमाशा बघणार. केसेस घ्यायची यांच्यात धमक नाही. केस घ्यायची पाळी येते, तेव्हा गरीब शिवसैनिक पुढे असतो" असं निलेश राणे म्हणाले.

"एवढ सर्व होऊनही शिवसेनेला कळत नाही. कोणाशी नडाव, कोणाशी नडू नये, भविष्यात त्यांना समजेल. यात्रा नियोजनानुसारच होणार, कितीही प्रयत्न केले तरी यात्रा जिथे संपायची तिथेच संपणार" असे निलेश राणे यांनी सांगितले.