नाशिक : कोरोनात (Corona) अनाथ झाल्याने ‘पोरकेपणाची सल' अनुभवणाऱ्या बालकांना शाश्वत पालकत्वाची छाया मिळावी या भावनेतून नाशिकचे जिल्हाधिकारी सुरज मांढरे (Suraj Mandhare) यांनी दोन जुळ्या मुली दत्तक घेतल्या आहेत. त्यांच्यापासून प्रेरणा घेत त्यांच्या सहकारी अधिकाऱ्यांनीही कोरोनामुळे अनाथ झालेल्या ५० बालकांच्या शिक्षणाची जबाबदारी स्विकारली आहे. जिल्हाधिकारी मांढरे यांच्या कार्याबद्दल सोशल मीडियावर नेहमी सक्रीय असणाऱ्या खासदार सुप्रिया सुळे (Supriya sule) यांनी ट्विट करत त्यांचे अभिनंदन केेले आहे.

सुप्रिया सुळे ट्विटमध्ये म्हणतात,

''नाशिक जिल्हाधिकारी सुरज मांढरे यांनी कोरोनामुळे आई वडिलांचे छत्र हरपलेल्या जुळ्या मुलींना दत्तक घेतले. त्यांच्यापासून प्रेरणा घेत त्यांच्या सहकारी अधिकाऱ्यांनीही कोरोनामुळे अनाथ झालेल्या ५० बालकांच्या शिक्षणाची जबाबदारी स्विकारली आहे. कोरोनाच्या संकटातून देश सावरत असताना सुरज मांढरे व त्यांच्या सहकाऱ्यांनी आपल्या कृतीतून आदर्श प्रस्थापित केला आहे. याबद्दल त्यांचे मनःपूर्वक अभिनंदन.'' असे ट्विट खा. सुप्रिया सुळे यांनी आपल्या ट्विटर हँडलवर केले आहे.

अनेकांनी अनुकरण करावे, असा उपक्रम

कोरोना महामारीचा अनपेक्षित धक्का प्रत्येकाला खूप काही शिकवून गेला. अनेकांना तर कायमचा पोरकं करून गेला. कधीही भरुन न येणारी ही पोरकेपणाची उणीव भरून काढण्यासाठी जिल्ह्यातील महसूल आधिकाऱ्यांनी एक अनोखा उपक्रम हाती घेतला आहे. जिल्हाधिकारी श्री. मांढरे यांच्यासह उपजिल्हाधिकारी व प्रांताधिकारी दर्जाच्या आधिकाऱ्यांनी एक व दोन पालक गमावलेल्या ५६ बालकांना दत्तक घेतले आहे. जिल्हाधिकारी मांढरे यांनी दोन जुळ्या मुली दत्तक घेतल्या आहेत. त्यात, शासकीय योजनां व्यतिरिक्त संबंधित मूलांच्या अडी-अडचणींवर हे आधिकारी संबधित मूल सज्ञान होईपर्यंत कायम लक्ष ठेवून शाश्‍वत स्वरुपाची मदत करणार आहेत. इतर ठिकाणी अनेकांनी अनुकरण करावे, असा हा उपक्रम आहे.