सातारा: खासदार उदयनराजे भोसले (Udayanraje Bhosale) यांचा वाढदिवस आहे. सातारकर (Satara) नेहमीच राजेंचा वाढदिवस साजरा करण्यासाठी उत्सुक असतात. त्यांना शुभेच्छा देण्यासाठी राजवाड्यावर दरवर्षी गर्दी असते. उद्या (ता. २४) ते एक मोठी घोषणा करणार आहेत. यासाठी त्यांनी पत्रकारांना व जनतेस निमंत्रण दिले आहे. या संदर्भात उदयनराजे यांनी ट्विट करत माहिती दिली आहे. यानंतर राजकिय वर्तुळात खळबळ उडाली आहे.

सध्या महाराष्ट्रात चाललेले सत्ताधारी आणि विरोधक यांच्या टीका-टीप्पणी नंतर आता उदयनराजे काय बोलणार आहेत याकडे सगळ्यांचे लक्ष लागून राहिले आहे. दरम्यान,उदयनराजे यांनी ट्विटमध्ये म्हटले आहे की, उद्या एक मोठी घोषणा करायचे मनात आहे. राजकीय आरोप-प्रत्याआरोपांच्या ह्या वातावरणात पहिल्याच वाक्याने ज्या ज्या शक्यता तुमच्या डोक्यात आल्या असतील त्यामधले काहीच आसणार नाही. उपक्रम अभिनव असे आहे. तेव्हा हे आमंत्रण पण फार औपचारिक अशा धाटणीचे नाही.

आपण सारेच आपल्या भोवती सुरू असणाऱ्या घटना पाहत असतो. काही अयोग्य वाटल्या तर त्या कोणीतरी दुरुस्त करेल अशी केवळ इच्छा आपण व्यक्त करत असतो. आम्ही मात्र एका सामाजिक प्रश्नावर गेली अनेक वर्षे प्रशासकीय बदलांसाठी अनेक प्रयत्न केले. पण ते पुरेसे नाहीत. गेल्या काही दिवसांच्या चिंतनातून आम्ही या प्रश्नाचे उत्तर म्हणून स्वतःच एक व्यवस्था उभी करण्याचे ठरविले आहे.

कोणता प्रश्न काय व्यवस्था अशा प्रश्नांच्या उत्तरांसाठी आम्ही आपणांस सदर पत्राने आमंत्रण देत आहोत.२४ फेब्रुवारी सायंकाळी सहा वाजता गांधी मैदान, राजधानी सातारा याठिकाणी आपण उपस्थित रहावे असे आमंत्रण देण्यात आले आहे.