मुंबईः राज्यसेवा पूर्व परीक्षेसाठी २९ डिसेंबर २०२३ रोजी जाहिरात प्रसिद्ध करण्यात आलेली होती. २७४ पदांसाठी २८ एप्रिल २०२४ रोजी परीक्षा घेण्याचे नियोजित होते. परंतु राज्य सरकारने मराठा आरक्षणाचा निर्णय घेतला आणि स्वतंत्र १० टक्के आरक्षण देऊ केले. त्यामुळे ही परीक्षा पुढे ढकलण्यात आलेली होती.

राज्य सरकारने मराठा समाजासाठी सामाजिक आणि शैक्षणिकदृष्ट्या मागास प्रवर्ग निर्माण करुन स्वतंत्र १० टक्के आरक्षण दिलं आहे. त्यामुळे राज्याच्या नियंत्रणाखालील पदांवरील नियुक्तीकरीता हे आरक्षण लागू करण्यात आलेले आहे. त्यामुळे राज्यसेवा पूर्व परीक्षा पुढे ढकलण्यात आलेली होती.

महाराष्ट्र लोकसेवा आयोगाने ८ मे रोजी काढलेल्या शुद्धीपत्रकात म्हटले आहे की, सामाजिक व शैक्षणिकदृष्ट्या मागासवर्गाकरीता आरक्षण निश्चिती करुन सुधारित मागणीपत्र पाठविण्याबाबत शासनात कळविण्यात आलेले असून आयोगाच्या २१ मार्च २०२४ रोजीच्या प्रसिद्धीपत्रकाद्वारे प्रस्तूत परीक्षा पुढे ढकलण्यात आल्याचे जाहीर करण्यात आले होते. त्यानुसार आता शनिवार, दि. ६ जुलै २०२४ रोजी राज्यसेवा पूर्व परीक्षा होणार आहे.

राज्यसेवा परीक्षेमार्फत भरावयाची एकूण पदे ४३१ आहेत. यामध्ये उपजिल्हाधिकारी गट - अ ७ पदे, सहाय्यक राज्य कर आयुक्त, गट-अ ११६ पदे, गटविकास अधिकारी, गट-अ ५२ पदे, सहायक संचालक- ४३ पदे, सहायक आयुक्त/ प्रकल्प अधिकारी- ३ पदे अशा ५२४ पदांचा सुधारित तपशील शुद्धीपत्रकात देण्यात आलेला आहे.