नागपूर शिक्षक मतदारसंघ निवडणुकीत महाविकास आघाडीकडून (Mahavikas Aghadi) शिवसेनेच्या शिक्षक सेनेचे गंगाधर नाकाडे यांनी उमेदवारी अर्ज दाखल गेला होता. पण काही वेगवान घडामोडींनंतर त्यांना अर्ज माघारी घ्यावा लागला. मातोश्रीवरून कॉल आल्यानंतर त्यांनी शेवटच्या क्षणी हा निर्णय घेतला. तर अखेरच्या क्षणी नेमकं घडली तर काय? या चर्चेला राजकीय वर्तुळात उधाण आलं आहे. (Nagpur Graduate Constituency Election Gangadhar Nakade ShivSena Uddhav Thackeray maharashtra politics)

गंगाधर नाकाडे यांनी सहा महिन्यांपासून तयारी केली होती. पण आता शेवटच्या क्षणी त्यांनी माघार घेतली आहे. अर्ज मागे घेण्याची वेळ ३ वाजेपर्यंत पर्यंत होती. शिवसेना भवनातून आदेश नाकाडे यांना अडीच वाजण्याच्या सुमारास आला असल्याचे सांगण्यात येत आहे.

त्यामुळे गंगाधर नाकाडे यांची चांगलीच धावपळ झाली. ते अखेरच्या क्षणी अक्षरशः सिग्नल तोडून विभागीय आयुक्त कार्यालयात दाखल झाले आणि अगदी धावत पळत त्यांनी आपला उमेदवारी अर्ज मागे घेतला.

गेल्या पाच वर्षांपासून शिक्षक सेनेचा मी विभागीय अध्यक्ष आहे. शिवसेनेच्या (उद्धव बाळासाहेब ठाकरे) शिक्षक सेनेचे राज्याध्यक्ष अभ्यंकर यांचा मला कॉल आला होता. त्यांनी उमेदवारी अर्ज मागे घ्यायला सांगितला. त्यामुळे आता पक्षश्रेष्ठी सांगतील, त्या उमेदवाराचे काम आम्ही आता करू. या घडामोडींमुळे आमचा हिरमोड नक्कीच झाला आहे, अशी प्रतिक्रिया नाकाडे यांनी अर्ज मागे घेतल्यावर दिली.

तसेच, गेल्या पाच वर्षांत आम्ही शिक्षकांसाठी भरपूर काम केले. कार्यकर्त्यांनी प्रचंड परिश्रम घेतले होते. संघटना चांगल्या पद्धतीने बांधली होती. ही जागा लढलो असतो, तर सर्वाधिक जास्त मतांनी ही जागा निवडून आली असती. पण श्रेष्ठी जो निर्णय घेतात, तो योग्य असतो. महाविकास आघाडीचा उमेदवार असो किंवा अन्य कुणीही, जे पक्षश्रेष्ठी सांगतील, त्या उमेदवाराचे काम करणार असल्याचेही गंगाधर नाकाडे यांनी सांगितले.