नागपूर :  देशाच्या हृदयस्थानी असल्याने नागपूर शहराच्या चारही दिशांनी ट्रक ट्रान्सपोर्ट टर्मिनल उभारण्यासाठी व्यापाऱ्यांनी पुढाकार घ्यावा. त्यासाठी जागा उपलब्ध करून दिली जाईल. मोठे गोडावून शहराच्या चारही बाजूने उभारण्यात आल्यास नागपूर हे विविध उत्पादनांचे आणि निर्यातीचे मोठे केंद्र होईल. येथील अर्थव्यवस्थेला चालना मिळणार आहे, असे प्रतिपादन केंद्रीय मंत्री नितीन गडकरी यांनी येथे केले. 

नाग विदर्भ चेंबर ऑफ कॉमर्सच्या पदाधिकाऱ्यांशी व्हिडिओ कॉन्फरन्सच्या माध्यमातून संवाद साधताना दे बोलत होतो. यात नाग विदर्भ चेंबर ऑफ कॉमर्सचे अध्यक्ष अश्विन मेहाडिया, कॅटचे अध्यक्ष बी.सी. भरतीया, कॅमेटचे अध्यक्ष दीपेन अग्रवाल, माजी अध्यक्ष हेमंत गांधी, उपाध्यक्ष अर्जुनदास आहूजा, संजय अग्रवाल, रामअवतार तोतला, सचिन पुनियानी उपस्थित होते. गडकरी म्हणाले, उद्योजक व व्यापाऱ्यांना एमएसएमईचे लाभ मिळावेत यासाठी मी सकारात्मक आहे. विविध उद्योजक आणि व्यापाऱ्यांना एमएसएमईत आणण्याचा प्रयत्न आहे.

‘रिया’चे वय १७ वर्षे ११ महिने २८ दिवस, तर दाखल झाला नसता हा गुन्हा, वाचा सविस्तर

नागपूर शहराबाहेर रिंगरोडवर सर्व व्यापारी आणि उद्योजकांसाठी गोडावून बनवावे. यासाठी चेंबरने पुढाकार घ्यावा. शहराच्या चारही दिशांना ट्रक ट्रान्सपोर्ट टर्मिनलची आवश्यकता आहे. यासाठी जागा उपलब्ध करता येईल. गोडावून बांधल्यानंतर ट्रान्सपोर्ट शहराबाहेर जाईल आणि प्रदूषणही कमी होईल. होलसेल किराणा व्यापाऱ्यांसाठी कळमन्यात जागा आहे. तेथे बहुमजली मार्केट उभे करता येईल. २५ वर्षानंतरचे नागपूर व्यापारी उद्योगाच्या दृष्टीने कसे असेल याचे डिझाईन तयार करावे. यातून रोजगार निर्माण होतील, पर्यटकांची संख्याही वाढेल. कोरोना काळात चेंबरच्या पदाधिकाऱ्यांनी गरिबांच्या पाठीशी मदतीसाठी उभे राहण्याचे आवाहनही त्यांनी केले. 

अजनी  मल्टिमॉडल  हब 

अजनी रेल्वे स्टेशन हे  मल्टिमॉडल हब बनविले जात असून यासाठी ९०० कोटी खर्च केले जाणार आहे. अमेरिकेच्या आर्किटेक्टने हे डिझाईन बनवले आहे. एकाच ठिकाणाहून अनेक सेवा उपलब्ध होणार आहेत. तसेच बडनेरा गोंदिया, गोंदिया चंद्रपूर, रामटेक नरखेड, नरखेड वडसा, बडनेरा छिंदवाडा ही ब्रॉडगेज मेट्रो सुरू होणार आहे. या मुळे नागपूरचे महत्त्व वाढणार असल्याचेही गडकरी म्हणाले.