मुंबई : राज्यात चाललेल्या भोंग्याच्या प्रकरणामुळे वाढलेल्या तणावामुळे आणि सदावर्ते यांच्या चाललेल्या अटकेबाबत कॉंग्रेसचे प्रदेशाध्यक्ष नाना पटोले यांनी आपली प्रतिक्रिया व्यक्त केली आहे. त्याबरोबर त्यांनी भाजपाच्या राजकारणावरही निशाना साधत टीका केली आहे.

राज्यात आणि देशभरात सध्या मशिदीवरील भोंग्याच्या प्रकरणावरुन वाद सुरु आहेत. भाजपाकडून केंद्रातील आपली खुर्ची वाचवण्यासाठी सांप्रदायिक तेढ निर्माण करण्याचा प्रयत्न केला जात आहे असं नाना पटोले यांनी सांगितलं. केंद्रात सत्तेत असलेलं भाजपा सरकार गेल्या आठ वर्षात सपशेल अपयशी ठरलं आहे. ते आता आपली खुर्ची वाचवण्यासाठी समाजामध्ये तेढ निर्माण करत आहेत.

राज्यातील ७२ टक्के मुस्लीम समाजाने भोंग्याचे आवाज कमी केले आहेत, काहींनी मशिदीवरील भोंगे खालीही उतरवले आहेत. राज्यातील हिंदू आणि मुस्लीम समाजातील भाईचारा संपू नये यासाठी मुस्लीम समाज पुढाकर घेत असेल तर हे गौरवास्पद आहे असं ते बोलताना म्हणाले.

गेल्या पाच महिन्यात एसटी कर्मचाऱ्यांचं आणि जनतेचं मोठं नुकसान झालं आहे. कामगारांचे वकील गुणरत्न सदावर्ते यांच्याकडे नोटा मोजण्याची मशीन सापडली आहे. भाजपाने पाच महिने हे आंदोलन तेवत ठेवलं, त्यांनी जनतेला त्रास दिल्याचा आरोप पटोलेंनी केला. एसटी कर्मचाऱ्यांच्या मागण्या योग्य आहेत, त्यांच्या मागण्या सरकारने मान्य कराव्यात आणि त्यांना न्याय द्यावा अशी आशा त्यांनी यावेळी व्यक्त केली आहे.

आगामी निवडणूकांची तयारी सध्या सर्वजण करत आहेत. त्यामुळे कोण कुणाची पोलखोल करेल ते दिसेलंच, कारण जनता समजदार आहे. जनतेला सांगायची गरज पडत नाही, आगामी निवडणूकांमध्ये जनता भाजपाची पोलखोल करेल असं नाना पटोले यांनी बोलताना सांगितलं.