मुंबईः केंद्रीय मंत्री नारायण राणे यांनी आज उद्धव ठाकरेंवर जोरदार टीकास्र सोडलं. शिवसेनेचा इतिहास सांगताना त्यांनी जुन्या आठवणींना उजाळा दिला. मुंबईत पुस्तक प्रकाशन समारंभात ते बोलत होते.

'शिवसेना लोकाधिकार आणि मी' या खासदार गजानन कीर्तिकर यांच्या पुस्तकाचा आज प्रकाशन सोहळा संपन्न झाला. मुखमंत्री एकनाथ शिंदे यांच्या हस्ते पुस्तकाचं प्रकाशन झालं. मुंबईतल्या सहारा हॉटेल येथे हा कार्यक्रम झाला.

यावेळी बोलताना नारायण राणे म्हणाले की, या पुस्तकामध्ये ५७ वर्षांचा शिवसेनेचा इतिहास लिहिला आहे. त्यामुळे शिवसैनिकांनी हे जरुर वाचावं. माझाही पुस्तकात उल्लेख केला असून आम्ही सुरुवातीपासूनच शिवसेनेते होतो. शिवसेनेत आलो तेव्हा मी १५ वर्षाचा होतो. दुसऱ्या मुलाला पुढे करत त्याचं नाव नारायण राणे सांगून मी शिवसैनिक झालो, कारण मी लहान होतो अन् हाईट पण कमी होती.

राणे पुढे म्हणाले की, मी १८ वर्षे क्रॉस केल्यानंतर मला आयकर विभागात नोकरी मिळाली. शिवसेना जन्माला आली तेव्हा उद्धव ठाकरे ८ वर्षांचे होते. तेव्हा रुमाल पण सोबत नव्हता त्यांच्या. कोणी एकाने सांगवं की, त्यांनी कोणत्या आंदोलनात भाग घेतला.. कधी शिवसेना जिंदाबाद असं तरी म्हटलंय का? उच्चार बरोबर येईल की नाही, याची भीती वाटत असेल.

उद्धव ठाकरेंबद्दल बोलताना राणे पुढे म्हणाले की, ते सध्या खोक्यांचे आरोप करत आहेत. परंतु माझ्याकडे पुराव्या सकट १०५ प्रकरणं आहेत. जी माणसं मातोश्रीवर पैसे घेऊन गेले त्यांची माहिती आहे. काही माणसं आता पण इथे आहेत. आता कोरोना काळात औषधांवर १५ टक्के कमिशन कोणी घेतले? सांगा नाहीतर मी सांगतो. संजय दत्त पण तेव्हा मातोश्रीवर बॅग ओढत घेऊन गेला होता. संजय दत्त कसा आला? बॅग घेऊन.. गेटपासून बॅग ओढत ओढत घेऊन गेला ना? कोणत्या गेट मधून आला ते पण सांगू का?

राणे पुढे म्हणाले की, एकनाथ शिंदेनी ४० आमदार पिकनिकला नेले, पण तुम्हाला सांभाळता आले नाहीत. खोक्यांचे आरोप काय करता? आता एअर इंडियाबद्दल पण सांगतो. पावसकर सांगा, त्या उध्दव ठाकरेंना किती मिळायचे? एअर इंडियाचा मॅनेजर हरिहरन महिना 25 लाख द्यायचा उध्दव ठाकरेंना. लावा माझी चौकशी मी देतो उत्तर.

असे गंभीर आरोप करत राणे पुढे बोलले की, एकनाथ शिंदेंना विनंती आहे की, जालन्यामध्ये जे झालं त्यात लक्ष द्या. मराठा समाज 34 टक्के आहे, कोणत्याही जातीचा अंत पाहू नका.. लक्ष द्या.