मुंबई - Vedanta Foxconn Project : वेदांता-फॉक्सकॉन प्रकल्प गुजरातमध्ये हलवल्यानंतर राज्यातील राजकीय वातावरण चांगलेच तापले आहे. मुख्यमंत्री एकनाथ शिंदे सरकारकडून उद्योगमंत्री उदय सामंत यांनी यावर सारवासारव करत पंतप्रधान नरेंद्र मोदींनी यापेक्षा मोठा प्रकल्प महाराष्ट्राला देण्याचं आश्वासन दिल्याची माहिती दिली. या वादात आता खासदार नवनीत राणा यांनी उडी घेतली आहे. तसेच शिंदे-फडणवीस सरकारची पाठराखण केली आहे. (Navneet Rana news in Marathi)

नवनीत राणा म्हणाल्या की, मागच्या सरकारने पाठपुरावा न केल्याने प्रकल्प गुजरातला गेला. एवढा मोठा प्रोजेक्ट इथे आणण्यासाठी प्रपोजल असतो, त्यासाठी आवश्यक असलेला पाठपुरावा आधीच्या सरकारने केला नाही. वेळेत पाठपुरावा झाला नाही. त्यामुळे तो प्रकल्प दुसऱ्या राज्यात गेला असून हा आमच्या सर्वांसाठी धक्का आहे. मागच्या सरकारमुळेच हा प्रकल्प येथून तिथं हलवण्यात आल्याचंही नवनीत राणा यांनी म्हटलं. राणा यांनी अप्रत्यक्षरित्या विद्यमान एकनाथ शिंदे-देवेंद्र फडणवीस सरकारची पाठराखणच केली आहे.

दरम्यान या प्रकल्पासंदर्भात सामंत म्हणाले होते की, दोन महिन्यात प्रकल्प गुजरातला जावू शकत नाही. त्याचवेळी एकनाथ शिंदे यांचा मुख्यमंत्री झाल्यानंतरच्या पहिल्याच अधिवेशनातील एक व्हिडीओ क्लिप व्हायरल झाली आहे. या व्हिडीओ क्लिपमध्ये मुख्यमंत्री स्पष्ट म्हणताना दिसतात की, वेदांता प्रकल्प लवकरच महाराष्ट्रात येत आहे. केवळ २१ दिवसांपूर्वी त्यांनी हे विधान केलं होतं. अर्थात त्यांच्या या विधानामुळे वेदांता प्रकल्प २१ दिवसांतच गुजरातला गेल्याचं स्पष्ट झालं आहे. त्यामुळे एकनाथ शिंदेंची घोषणा खरी होती की, उद्योगमंत्री सामंत खरं बोलतात, असा प्रश्न उपस्थित होत आहे.