मागील काही दिवस सातत्याने पत्रकार परिषद घेणार राष्ट्रवादीचे मंत्री नवाब मलिक चर्चेत आहेत. समीर वानखडे प्रकरणातही त्यांचे नाव वारंवार समोर येत होते. ड्रग्जप्रकरणी एनसीबीचे अधिकारी समीर वानखडे यांच्यावर त्यांनी काही आरोपही केले होते. दरम्यान, याकाळात त्यांची अनेक ट्वीट्स समोर आली होती. आताही त्यांनी आणखी एक कोरोनासंबंधित ट्वीट केले आहे. यात त्यांनी अभिनेता राजू श्रीवास्तव यांचा व्हिडिओ शेअर केला आहे.

यात शेअर केलेल्या व्हिडिओमध्ये अभिनेत्याने महाराष्ट्रात १३ मंत्री आणि ७० विधायक कोरोना पॉझिटिव्ह आहेत. आता तो दिवस दुर नाही जेव्हा पुढे जाऊन कोरोनाच आपले सरकार प्रस्थापित करले, असे विधान केले आहे. त्यावर तुम्ही कोणते टॉनिक घेता, या तोडग्याचा एखादा उपाय तरी सूचवा, असा उपरोधिक टोला मंत्री मलिक यांनी लगावला आहे. याआधीही अभिनेता राजू श्रीवास्तव यांनी असे वादग्रस्त विधान केले होते. आता आणखी एका वाक्याने नव्या वादाला तोंड फुटण्याची शक्यता वर्तवण्यात येत आहे.

दरम्यान, सध्या देशात पाच राज्यांच्या विधानसभा निवडणूकांचा कार्यक्रम जाहीर झाला आहे. यामुळे सर्व पक्षांनी कबंर कसली आहे. या रिंगणात आता राष्ट्रवादी पक्षही उतरणार आहे. तीन राज्यांतील निवडणुकीत यावेळी राष्ट्रवादीही उतरणार असल्याची माहिती अध्यक्ष शरद पवार यांनी दिली आहे. त्यामुळे आता अगामी निवडणुकीत चांगलीच चुरस पहायला मिळणार आहे.