मुंबई: राज्याचे अल्पसंख्यांक मंत्री नवाब मलिक यांनी आतापर्यंत एनसीबीचे विभागीय संचालक समीर वानखेडे यांच्यावर अनेक आरोप केले आहेत. गेल्या काही दिवसांपासून त्यांनी सातत्याने पत्रकार परिषद घेऊन आरोपांच्या फैरी झाडल्या आहेत. आर्यन खान ड्रग्ज प्रकरणानंतर सुरु झालेली आरोपांची मालिका अद्याप सुरुच आहे. याआधी वानखेडे यांच्या कारवांयावर नवाब मलिक यांनी प्रश्न उपस्थित केले होते. त्यानंतर वानखेडेंनी बोगस जात प्रमाणपत्राच्या आधारे नोकरी मिळवल्याचा आरोपही केला. आता समीर वानखेडे यांनी हिंदु असल्याचा दावा करत असताना मलिकांनी नवा खुलासा केला. ट्विटरवर त्यांनी गूड मॉर्निंग म्हणत समीर वानखेडेंचा पहिला निकाह झाला होता असं म्हटलं आहे. त्यांच्या या निकाहचे प्रमाणपत्र आणि फोटो देखील त्यांनी ट्विटरवर जाहीर केला आहे.

नवाब मलिकांनी म्हटलंय की, मी हे स्पष्ट करु इच्छितो की, मी जो समीर वानखेडेंबाबत खुलासे करत आहे, ते धर्मासंबंधी नाहीयेत. ज्यापद्धतीने फसवणूकीच्या मार्गाने त्यांनी IRS ची नोकरी प्राप्त करण्यासाठी एका मागासवर्गीय जातीच्या व्यक्तीवर अन्याय करुन खोट्या जातप्रमाणपत्राच्या आधारे ही नोकरी मिळवली आहे.

सोबतच त्यांनी समीर वानखेडे यांच्या डॉ. शबाना कुरेशीसोबतच्या विवाहाचा फोटो देखील पोस्ट केला आहे. तसेच त्या लग्नाचा 'निकाह नामा' देखील त्यांनी प्रसिद्द केला आहे.