मुंबई : राष्ट्रवादीचे प्रवक्ते आणि मंत्री नवाब मलिक (minister nawab malik) हे एनसीबीचे अधिकारी समीर वानखेडे यांच्यावर सातत्याने आरोप करत आहेत. आता त्यांनी ट्विटरवर एक जन्माचा दाखला शेअर केला असून हा दाखल समीर वानखेडे यांचा असल्याचा दावा मलिकांनी केला आहे. तसेच 'समीर दाऊद वानखेडे, का यहां से शुरू हुआ फर्जीवाड़ा' असा सवाल मलिकांनी वानखेडेंना विचारला आहे.

नवाब मलिकांनी यापूर्वी देखील समीर वानखेडे यांच्यावर आरोप केले होते. तसेच एक वर्षात तुझी नोकरी जाईल, तुला तुरुंगात जावं लागेल, असं जाहीर भाष्य केलं होतं. तसेच पत्रकार परिषद घेऊन देखील वानखेडे यांच्यावर आरोप केले होते. आता आर्यन खान प्रकरणातील पंच प्रभाकर साईलने एक अॅफिडेविट आणि व्हिडिओ जारी करत समीर वानखेडेंकडून जीवाला धोका असल्याचे म्हटले आहे. तसेच आर्यन खान प्रकरण हे २५ कोटींमध्ये दाबण्याचा प्रयत्न करण्यात आला. त्यापैकी ८ कोटी समीर वानखेडे यांना जाणार होते, असाही गंभीर आरोप साईलने केला आहे.

प्रभाकर साईलच्या आरोपानंतर नवाब मलिक अधिकच आक्रमक झाले असून त्यांनी काल सत्यमेव जयते, असे ट्विट केले होते. तसेच आज त्यांनी समीर वानखेडे यांच्या पहिल्या लग्नातील एक फोटो देखील शेअर केला आहे. मलिकांनी जन्माचा दाखला ट्विट केला असून हा दाखल समीर वानखेडे यांचा असल्याचा दावा मलिकांनी केला आहे. यामध्ये समीर यांच्या वडिलांचे नाव दाऊद क. वानखेडे असं दाखवत आहे. तसेच या दाखल्यावर मुंबई महापालिकेचे नाव आहे.

दरम्यान, सोशल मीडियावर खोटे दस्तावेज प्रसिद्ध केले जात असून याबाबत तक्रार करणार आहे. माझ्या मूळ गावी जा आणि तपासा. जो जन्म दाखला सोशल मीडियावर प्रसिद्ध केला जात आहे, तो खोटा आहे. या खोडसाळपणाला कायदेशीर उत्तर देणार आहे, असं समीर वानखेडे यांनी म्हटलं आहे.