नवी दिल्ली- राष्ट्रवादी काँग्रेस अजित पवार गटाचे नेते प्रफुल्ल पटेल यांनी मोठा गौप्यस्फोट केला आहे. ते म्हणालेत की, 'प्रामाणिकपणे सांगायचं झालं तर राष्ट्रवादी काँग्रेसची स्थापना ही कोणता मोठा उद्देश डोळ्यासमोर ठेवून झालेली नाही. सोनिया गांधी यांच्या नेतृत्त्वाला विरोध या एकाच कारणासाठी राष्ट्रवादी काँग्रेसची स्थापना १९९९ मध्ये झाली.' एएनआयला दिलेल्या मुलाखतीत पटेल यांनी हा दावा केला आहे.

सोनिया गांधी यांच्याकडे काँग्रेसचे नेतृत्व जात असल्याने शरद पवार यांच्यामध्ये अस्वस्थता होती. सोनिया गांधी यांचे सल्लागार शरद पवार यांचं महत्व कमी करण्यासाठी प्रयत्न करत होते. पी.ए. संगमा हे उघडपणे सोनिया गांधी यांच्या विदेशी ओळखीबाबत टीका करायचे. आपण त्यांचे नेतृत्व स्वीकारू शकत नाही, असं ते म्हणाले होते. त्यामुळे हा विरोध संगमा यांच्यापासून सुरु झाला. त्यानंतर अनेक नेत्यांनी यात खतपाणी घालण्याचं काम केलं, असं पटेल म्हणालेत.

सोनिया गांधी यांच्याविरोधात गुप्त बैठका देखील झाल्या आहेत. पी.ए. संगमा, शरद पवार, जितेंद्र प्रसाद, संतोष मोहन देव, प्रेमरंजन दास मुंशी, राजेश पायलट या नेत्यांनी गुप्ता बैठका घेतल्या. सोनिया गांधी यांच्या नेतृत्वावरुन काँग्रेसच्या नेत्यांमध्ये अस्वस्थता निर्माण झाली होती. त्याच पार्श्वभूमीवर काँग्रेसमधून बाहेर पडू पाहणाऱ्या नेत्यांसाठी म्हणून नव्या पक्षाचा विचार सुरु झाला, असं ते म्हणाले.

जेव्हा राष्ट्रवादी काँग्रेसची स्थापना झाली तेव्हा पी. ए. संगमा, शरद पवार, तारिख अन्वर, मी स्वत: राष्ट्रवादीमध्ये सहभागी झालो. पण, जितेंद्र प्रसाद आणि राजेश पाटलट यांनी माघार घेतली. त्यांची राष्ट्रवादीत येण्याची इच्छा होती. पण, त्यांना वाटलं की ते स्वत:च्या जीवावर मतदारसंघात निवडून येऊ शकणार नाही. त्यांना काँग्रेसच्या नावाची आवश्यकता वाटली. शिवाय राष्ट्रवादी काँग्रेस नवा पक्ष असल्याने लोकांमध्ये पोहोचण्यास वेळ लागेल असं त्यांना वाटत होतं. त्यामुळेच त्यांनी काँग्रेसमध्ये राहण्याचा निर्णय घेतला, असं पटेल म्हणाले.

राष्ट्रवादी काँग्रेसची स्थापना त्यामुळे कोणत्याही वेगळ्या कारणासाठी नाही, तर सोनिया गांधी यांना विरोध म्हणून राष्ट्रवादीची स्थापना झाली आहे, असं प्रफुल्ल पटेल यांनी स्पष्ट केलं आहे. दरम्यान, प्रफुल्ल पटेल यांनी पुस्तक लिहून त्यात मोठे गौप्यस्फोट करेन असं म्हटलं होतं. त्यातीलच हा एक भाग असल्याचं म्हणता येईल.