भारतीय फुटबॉलसाठी आजचा दिवस काळा दिवस म्हणून मानला जात आहे. फुटबॉलची जागतिक संघटना फिफाने अखिल भारतीय फुटबॉल महासंघावर बंदी लादली आहे. त्यामुळे ही बंदी उठेपर्यंत भारतीय फुटबॉल संघ कोणतेही सामने खेळू शकणार नाहीत. आता याला राष्ट्रवादीचे खासदार प्रफुल पटेल यांना जबाबदार धरलं जात आहे. (Praful Patel FIFA)

FIFA ने भारतीय फुटबॉल संघावर घातलेल्या बंदीमुळे आता भारत कोणतेही सामने खेळू शकणार नाही. येत्या ऑक्टोबरमध्ये महिलांचा अंडर १७ वर्ल्ड कप होणार होता, मात्र आता तेही होणार नाही. अखिल भारतीय फुटबॉल महासंघाचे माजी अध्यक्ष आणि राष्ट्रवादी काँग्रेसचे नेते प्रफुल्ल पटेल या सगळ्या वादाला कारणीभूत असल्याचं सांगितलं जात आहे.

२००९ मध्ये प्रफुल्ल पटेल यांना भारतीय फुटबॉल महासंघाचा अध्यक्ष बनवण्यात आलं होतं. २०२२ मध्ये त्यांना सर्वोच्च न्यायालयाने पदावरुन काढून टाकलं होतं. भारतीय क्रीडा संहितेनुसार कोणतीही व्यक्ती ३ पेक्षा जास्त वेळा अध्यक्ष राहू शकत नाही. मात्र प्रफुल्ल पटेल राज्य संघटनांच्या मदतीने निवडणुका होऊ देत नाहीयेत, असा त्यांच्यावर आरोप आहे. तसंच त्यांनी आपल्या अधिकारांचा गैरवापर केल्याचाही ठपका ठेवण्यात आला आहे. प्रफुल्ल पटेल यांना पदावरुन हटवल्यानंतरच याबाबतच्या हालचाली सुरू झाल्या होत्या, असेही आरोप होत आहेत. ट्विटरवर सध्या Praful Patel ट्रेंडिंग आहेत.