राष्ट्रवादीचे आमदार रोहित पवार एका नव्या वादात सापडण्याची शक्यता आहे. आमदार नितेश राणे यांनी रोहित पवारांचं एक पोस्टर शेअर केलं आहे. ज्यामध्ये छत्रपती शिवाजी महाराज यांच्या फोटोवर शरद पवारांचा फोटो लावण्यात आला आहे.

भाजपा आमदार नितेश राणे यांनी ट्विट करत रोहित पवारांच्या या पोस्टरकडे लक्ष वेधलं आहे. शिवाजी महाराजांपेक्षा मोठं कोण? असा प्रश्न त्यांनी आपल्या ट्विटमधून विचारला आहे. त्यांचा रोख थेट शरद पवार यांच्यावर असल्याचं दिसत आहे. छत्रपती शिवाजी महाराज यांच्या फोटोच्या वर राष्ट्रवादी काँग्रेसचे अध्यक्ष शरद पवार यांचा फोटो लावल्याचं या पोस्टरमध्ये दिसत आहे.

शरद पवार यांच्या वाढदिवसानिमित्त रोहित पवार यांच्या मार्फत गड किल्ले बांधणी स्पर्धा आयोजित करण्यात आली आहे. त्याचंच हे पोस्टर आहे. या पोस्टरच्या मांडणीवरुन आता नितेश राणे नवा वाद उपस्थित करत असल्याचं दिसून य़ेत आहे. आता हे प्रकरण अधिक ताणलं जाईल की लवकरच मिटेल हे येणारा काळच ठरवेल.