Onion Export Ban Lift Latest News : केंद्र सरकारने कांदा निर्यातीवरील बंदी हटवण्याचा निर्णय घेतला आहे. केंद्रीय गृहमंत्री अमित शाह यांच्या अध्यक्षतेखालील समितीने कांदा निर्यातील मंजुरी दिली आहे. केंद्र सरकारने देशातील कांद्याच्या किमती नियंत्रणात आणण्यासाठी निर्यातीवर बंदी घातली होती, यानंतर शेतकरी वर्गाकडून मोठ्या प्रमाणात नाराजी व्यक्त करण्यात आली. दरम्यान ही बंदी मागे घेतल्याचा शेतकऱ्यांना सोडून व्यापाऱ्यांनाच फायदा होईल अशी टीकी विरोधकांकडून सरकारवर करण्यात येत आहे.

कांदा निर्यात बंदीची डेडलाईन ३१ मार्चपर्यंत होती, मात्र डेडलाईन संपण्याच्या आधीच सरकारने ही बंदी हटवली आहे. राष्ट्रवादी काँग्रेसच्या शरद पवार गटाचे नेते रोहित पवार यांनी केंद्र सरकारने हा निर्णय उशीरा घेतल्याचा मुद्दा पुढे करत टीका केली आहे.

आमदारा रोहित पवारांनी सोशल मीडिया प्लॅटफॉर्म एक्सवर पोस्ट केली आहे. यामध्ये "जेंव्हा शेतकऱ्यांच्या कांद्याला चार पैसे मिळत होते तेंव्हा केंद्र सरकारने निर्यातबंदी केली आणि मग अडलेल्या शेतकऱ्याने कवडीमोल भावात कांदा विकल्यानंतर ही निर्यात बंदी हटवली.तीही शेतकऱ्यांचा कळवळा आल्याने नाही तर उद्याच्या लोकसभा निवडणुकीत रडण्याची वेळ येऊ नये म्हणून घेतलेला हा निर्णय आहे" असा आरोप रोहित पवारांनी केला आहे.

"पण आता या निर्णयाचा कांदा उत्पादक शेतकऱ्यांना काहीही फायदा होणार नाही तर शेतकऱ्यांकडून मातीमोल भावात कांदा घेऊन साठवून ठेवलेल्या बड्या व्यापाऱ्यांनाच या निर्णयाचा फायदा होणार आहे.. यावरुन हे केंद्र सरकार शेतकऱ्यांच्या विरोधातील आहे, हे पुन्हा एकदा स्पष्ट झालं!" असेही रोहित पवार म्हणाले आहेत.