uddhav thackeray, mla prakash phaterpekar: महाविकास आघाडीच्या वतीने आज मुंबईत महामोर्चाचे आयोजन करण्यात आलं होतं. भाजपच्या नेत्यांकडून सातत्याने महापुरुषांविषयी वादग्रस्त विधान करण्यात येत आहे. तसेच महाराष्ट्र-कर्नाटक सीमेचा वाद चिघळला आहे. याच्या निषेधार्थ शिवसेना, काँग्रेस, राष्ट्रवादी काँग्रेस आणि महाविकास आघाडीतल घटक पक्षांच्या वतीने महामोर्चात सहभागी झाले होते.

यावेळी उद्धव ठाकरे, शरद पवार, नाना पटोले, अजित पवार अशा नेत्यांनी सभेत उपस्थितांना संबोधीत केलं. मात्र एकिकडे मोर्चा चालू असताना दुसरीकडे ठाकरे गटाचे आमदार प्रकाश फातर्फेकर हे आज पार पडलेल्या मोर्चात सहभागी न होता शिंदे गटाचे खासदार राहुल शेवाळे यांच्यासोबत एका कार्यक्रमात एकत्र उपस्थित झाल्याच्या बातम्या आणि फोटो दिवसभर व्हायरल होत होते. मात्र आमदार प्रकाश फातर्फेकर यांनी फेसबुक पोस्ट करत आपली बाजू मांडली आहे.

त्यांनी पोस्टमध्ये लिहिलं आहे की, 'खोट्या बातम्या पसरवणे बंद करावे! मी कधीही शिवसेना उद्धवसाहेब ठाकरे यांची साथ सोडणार नाही. आज सकाळी विभागातील स्थानिक शासकीय महानगरपालिकेच्या कार्यक्रमाला भेट देऊन महाविकास आघाडीच्या महामोर्च्याला सक्रिय उपस्थित राहिलो.

प्रसारमाध्यमांसाठी महामोर्च्यातील व्यासपीठावरील छायाचित्रे जोडले आहेत. #TRP साठी प्रसारमाध्यमांनी अशा प्रकारचे खोट्या बातम्या पसरवणे आधी बंद करावे' त्यामुळे फातर्फेकर ठाकरे गटातच आहेत.