तात्या लांडगे

सोलापूर : सोलापूरच्या होटगी रोड विमानतळावर विमान क्रॅश (कोसळले) झाल्याची खबर रुग्णवाहिका व अग्निशामक विभागाला देण्यात आली. अवघ्या ११ मिनिटांमध्ये सर्व यंत्रणा विमानतळावर पोचली. त्यानंतर त्यांनी विमानतळावर जाऊन मदतकार्य सुरू केले. अग्निशामक विभागाने १० मिनिटांमध्ये आगीवर नियंत्रण मिळविले. पण, अहमदाबाद दुर्घटनेच्या पार्श्वभूमीवर हा मॉक ड्रिल करण्यात आला होता.

अहमदाबाद दुर्घटनेनंतर देशातील सर्वच विमानतळांवर प्रवाशांच्या सुरक्षेसाठी उपलब्ध यंत्रणांच्या मदतीचा अंदाज घेण्यात आला. सोलापूर विमानतळावर ११.१० मिनिटांनी विमान कोसळल्याची खबर संबंधित यंत्रणेसह स्थानिक रुग्णवाहिका व अग्निशामक विभागाला देण्यात आली. त्यानंतर रघोजी हॉस्पिटल, यशोधरा हॉस्पिटल, अश्विनी रुग्णालय आणि १०८ टोल फ्री क्रमांकाची रुग्णवाहिका अवघ्या ११ मिनिटांमध्ये विमानतळावर पोचली. होटगी रोड केंद्रावरील अग्निशामकचे बंब देखील १० मिनिटांमध्ये विमानतळावर आले. त्यानंतर तातडीने मदतकार्य सुरू केले आणि केवळ ११ मिनिटांमध्ये आगीवर नियंत्रण मिळविले. कोणती यंत्रणा कधीपर्यंत पोचते, मदतकार्यात कोणत्या त्रुटी आल्या याचे निरीक्षण विमानतळाच्या अधिकारी अंजनी शर्मा, अग्निशामक विभागाचे प्रमुख राकेशकुमार यांनी केले. यावेळी उत्तर सोलापूर तालुक्याचे तहसीलदार नीलेश पाटील, एमआयडीसी पोलिस ठाण्याचे वरिष्ठ पोलिस निरीक्षक प्रमोद वाघमारे, विजय खोमणे आदी उपस्थित होते.

विमानातील प्रवाशांचे नातेवाईक, माध्यमांचे प्रतिनिधी विमानतळावर आल्यावर त्यांना कोठे थांबवायचे, जेणेकरून मदतकार्यात कोणताही व्यत्यय येणार नाही, याचीही व्यवस्था करण्यात आली होती. अशाप्रकारे मॉक ड्रिल दोन वर्षातून एकदा होत असतो, पण अहमदाबाद दुर्घटनेनंतर देशातील सर्वच विमानतळांवर असे मॉक ड्रिल घेऊन मदतकार्याचा अंदाज घेण्यात आला. त्याचा अहवाल आता केंद्र सरकारला पाठविला जाणार आहे.