हिंगोलीतील वसमत शहरातील छत्रपती शिवाजी महराजांचा पुतळा दाखल झाला. मात्र येथे घटलेल्या एका प्रसंगामुळे राष्ट्रवादीच्या नेत्यावर टीका करण्यात आली. वसमत विधानसभेचे राष्ट्रवादीचे आमदार राजू नवघरे यांनी अश्वावर उभे राहून छत्रपती शिवाजी महाराज यांना हार अर्पण केला. यावरून राजकीय वर्तुळात मोठा वादंग निर्माण झाला आहे. अश्वावर उभे राहून महाराजांना हार घातलानाचा एक व्हिडीओ सोशल मिडीयावर व्हायरल झाला त्यामुळे विरोधकांनी त्यांच्यासह पक्षावर टीकेची झोड उठवली आहे. दरम्यान या प्रसंगावरून भाजपाचे निलेश राणे यांनी राष्ट्रवादीवर निशाना साधला आहे.

निलेश राणे यांनी ट्वीट करत राष्ट्रवादीवर खरमरीत टीका केली आहे. ते म्हणाले, राष्ट्रवादी काँग्रेसचा आमदार राजू नवघरे यांना भर चौकात फटके टाकले पाहिजे. या पक्षात सारे औरंगजेबासारखे आहेत. नवाब मलिक, जितेंद्र आव्हाड, अजित पवार तुमच्यात हिम्मत असेल तर ह्याची पक्षातून हकालपट्टी करा, असे आव्हानही त्यांनी केल आहे.

दरम्यान, हा व्हिडीओ व्हायरल झाल्यानंतर चूक लक्षात आल्यावर आमदार नवघरे यांनी माध्यमांसमोर माफी मागितली आहे. त्यांना रडू कोसळले. यावेळी ते म्हणाले, 'मी एकट्यानेच पाप केले असेल तर मला फाशी द्या. अनेक जण माझ्यासोबत छत्रपती शिवाजी महाराजांना हार घालण्यासाठी अश्वावर चढले होते. मग टीकेची झोड माझ्यावरच का? असा सवाल देखील त्यांनी या वेळी उपस्थित केला. 'माझं काही चुकलं असेल तर मला माफ करा', अशी माफीही त्यांनी मागितली आहे.