मुंबई - प्रधानमंत्री गरीब कल्याण अन्न योजनेतील राज्यामधील अंत्योदय अन्न योजना व प्राधान्य कुटुंबातील लाभार्थींना जुलै ते नोव्हेंबर २०२० या कालावधीसाठी अख्ख्या चण्याऐवजी प्रतिमहिना प्रत्येक शिधापत्रिकाधारकास एक किलो मोफत चणाडाळ वितरीत करण्याचा निर्णय मुख्यमंत्री उद्धव ठाकरे यांच्या अध्यक्षतेखाली बुधवारी  झालेल्या मंत्रिमंडळ बैठकीत घेण्यात आला.

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

राज्यात अख्ख्या चण्याऐवजी डाळ घेण्यास अधिक पसंती असल्याचे निदर्शनास आले असून, अनेक लोकप्रतिनिधींनी यासंदर्भात विनंती केल्याने हा निर्णय आज घेण्यात आला. या चणा डाळ वितरण योजनेसाठी एकूण ७३ कोटी ३७ लाख एवढा आर्थिक भार पडणार आहे.

तसेच शेतकरी कर्जमाफीच्या अंमलबजावणीसाठी एक हजार ५०० कोटी इतका निधी आकस्मिकता निधी अग्रिमातून उपलब्ध करून देण्याचा निर्णयही घेण्यात आला.

ऑनलाइन वर्गामुळे खर्च वाढला; म्हणून पालक उच्च न्यायालयात

अन्य निर्णय

• मुंबई शहर बेटावरील उपकरप्राप्त इमारतीत राहणाऱ्या लाखो रहिवाशांना इमारत पुनर्विकासाबाबत दिलासा म्हाडा अधिनियमात सुधारणा करण्याचा निर्णय आज घेण्यात आला. या निर्णयामुळे सुमारे १४ हजार ५०० उपकरप्राप्त इमारतीतील रहिवाशांना फायदा होणार आहे. 
• आर्थिक विवंचनेतील आदिवासींना आधार देणारी खावटी योजना पुन्हा सुरू करण्याचा निर्णय बैठकीत घेण्यात आला. २०१३-१४ पासून ही योजना बंद होती. आता या योजनेत १०० टक्के अनुदान देण्याचे आज ठरले. यानुसार ही योजना एक वर्षासाठी सुरू ठेवण्यात येईल.
• ‘एसईबीसी’ आणि ‘ईडब्ल्यूएस’ आरक्षणामुळे २०१९-२० या शैक्षणिक वर्षात खुल्या प्रवर्गातील काही विद्यार्थ्यांना खासगी विनाअनुदानित महाविद्यालयात प्रवेश घ्यावा लागला, अशा ११२ बाधित विद्यार्थ्यांना दरवर्षी सात कोटी ४९ लाख ३८ हजार ६०० रुपये प्रतिपूर्ती देण्याचे ठरले. 
• १८ शासकीय वैद्यकीय महाविद्यालये व ३ दंत महाविद्यालयातील निवासी डॉक्‍टरांच्या विद्यावेतनात वाढ करण्याचा निर्णय घेण्यात आला आहे. यानुसार कनिष्ठ निवासी व वरिष्ठ निवासी यांच्या सध्याच्या विद्यावेतनात दहा हजार रुपये वाढ याच महिन्यापासून करण्याचे ठरले.

Edited By - Prashant Patil