पुणे : मुख्यमंत्री उद्धव ठाकरे, त्यांच्या पत्नी रश्‍मी ठाकरे यांच्यासह शिवसेनेविरुद्ध आक्षेपार्ह ट्विट करणाऱ्या भाजपच्या सोशल मीडिया सेलचा पदाधिकारी जितेन गजरिया याच्याविरुद्ध पुणे सायबर पोलिसांकडे गुन्हा दाखल करण्यात आला होता. पोलिसांनी गजारिया यांची ८ तास चौकशी केली. त्यानंतर आता जितेन गजारिया यांनी महाराष्ट्राचे मुख्यमंत्री उद्धव ठाकरे यांच्या पत्नी रश्मी ठाकरे यांच्याबाबत केलेल्या ट्विटबद्दल पोलिसांकडे माफी मागितली आहे.

गजारिया यांच्या माफीनाम्यात त्यांनी ट्विट करताना भाषेच्या मर्यादेचे उल्लंघन केल्याचे त्यांनी म्हटले आहे. ही भाषा महिलांना आक्षेपार्ह आहे, त्यामुळे मी माफी मागतो. ही भाषा असभ्य आणि अपमानास्पद असल्यामुळे मी हे ट्विट डिलीट करत आहे आणि भविष्यात मी अशी भाषा वापरणार नाही, अशी ग्वाही त्यांनी दिली आहे.

शिवसेनेचे शहर उपसंघटक उमेश वाघ (वय 53, रा. गोखलेनगर) यांनी फिर्याद दिली होती. शिवसेनाप्रमुख गजानन थरकुडे यांच्या सुचनेनुसार, वाघ यांनी गुरुवारी दुपारी पुणे पोलिसांच्या सायबर पोलिस ठाण्यात गजरियाविरुद्ध गुन्हा दाखल केला. गजरिया हा भाजपच्या सोशल मीडिया सेलचा पदाधिकारी आहे. त्याने 4 जानेवारी रोजी मुख्यमंत्री उद्धव ठाकरे यांच्या पत्नी उद्धव ठाकरे यांच्याविषयी आक्षेपार्ह व बदनामीकारक ट्‌विट केले होते.

गजरिया याने मुख्यमंत्री उद्धव ठाकरे यांच्याविषयी देखील आक्षेपार्ह ट्‌विट करुन ते उपमुख्यमंत्री अजित पवार यांना टॅग केले होते. त्याचबरोबर त्याने दिवंगत माजी पंतप्रधान इंदिरा गांधी, कॉंग्रेसच्या पक्षाच्या अध्यक्षा सोनिया गांधी, राष्ट्रवादी कॉंग्रेसचे अध्यक्ष शरद पवार यांच्यासह शिवसेना, राष्ट्रवादी कॉंग्रेस व कॉंग्रेस पक्षाचे नेते, पदाधिकाऱ्यांविरुद्ध बदनामीकारक मजकुर ट्‌विटरवर प्रसिद्ध केला होता. तेवढ्यावरच न थांबता त्याने जाती-धर्मांमध्ये तेढ निर्माण होईल, अशा पद्धतीचे ट्‌विट केले आहे. गजरिया हा त्याच्या ट्‌विटमुळे कार्यकर्त्यांच्या भावना दुखावून द्वेष निर्माण करीत असल्याचे फिर्यादीमध्ये नमूद केले होते.