औरंगाबाद : महाराष्ट्र नवनिर्माण सेनेचे प्रमुख राज ठाकरे यांची १ मे रोजी सभा होणार आहे. मात्र सभेपूर्वीच राज्यातील राजकीय वातावरण चांगलेच तापले आहे. गुरुवारी (ता.२८) अखेर पोलिस आयुक्त निखिल गुप्ता यांनी सभेला परवागनी दिली आहे. राज ठाकरे (Raj Thackeray) यांची सभा रद्द करणारी याचिका मुंबई उच्च न्यायालयाच्या औरंगाबाद खंडपीठात (Aurangabad Bench) दाखल करण्यात आली होती. खंडपीठाने ती फेटाळली आहे. ही याचिका राजकीय हेतून प्रेरित असल्याचे न्यायालयाने म्हणत याचिकाकर्त्याला १ लाखाचा दंड ठोठावला आहे. (Petition Against Raj Thackeray Sabha Dismissed By Aurangabad Bench)

राज ठाकरे यांची सभा होऊ नये. त्यास मनाई हुकुम द्यावी या मागणीची याचिका रिपब्लिकन युवा मोर्चाने औरंगाबाद खंडपीठात दाखल केली होती. सदरील याचिकेच्या सुनावणी वेळी पोलिस आयुक्तांच्या आदेश न्यायालयासमोर सादर करण्यात आले. यावेळी सभेविषयी पोलिस आयुक्तांनी सर्व काळजी घेतली असल्याचेही न्यायालयाला सरकारी वकिलांनी सांगितले.

नंतर सदरील याचिका राजकीय हेतुने प्रेरित असल्याचे म्हणत उच्च न्यायालयाने याचिकाकर्त्याला १ लाखाचा दंड ठोठावत याचिका फेटाळली आहे.