मुंबई : भारताच्या गानकोकीळा लता मंगशेकर (Lata Mangeshkar Passes Away) यांचं आज निधन झालं. त्यांनी ९२ व्या वर्षी अखेरचा श्वास घेतला. आज सायंकाळी त्यांच्यावर अंत्यसंस्कार करण्यात येणार आहेत. त्यासाठी स्वतः पंतप्रधान मोदी (PM Modi) उपस्थित राहणार आहेत.

शिवाजी पार्कवर लता दीदींच्या पार्थिवावर अंत्यसंस्कार करण्यात येणार आहेत. त्यासाठी पंतप्रधान मोदी आज सायंकाळी चार वाजता मुंबईत दाखल होतील. त्यानंतर अंत्यसंस्काराच्या ठिकाणी उपस्थित राहतील, अशी माहिती मिळाली आहे.

लता मंगेशकर यांना कोरोनाची लागण झाल्यानंतर ब्रीच कँडी रुग्णालयात दाखल करण्यात आलं होतं. त्यांची प्रकृती स्थिरही झाली होती. मात्र, ५ फेब्रुवारीला अचानक प्रकृती खालावल्यानंतर त्यांना व्हेंटिलेटरवर ठेवण्यात आलं होतं. त्यानंतर मंगेशकर कुटुंबातील अनेकांनी रुग्णालयात जाऊन विचारपूस केली होती. आज सकाळी केंद्रीय मंत्री नितिन गडकरी यांनी ब्रीच कँडीमध्ये जाऊन लता मंगेशकर यांच्या तब्येतीची माहिती घेतली, त्यानंतर पत्रकारांशी बोलताना लता मंगेशकर यांचे निधन झाल्याचे त्यांनी सांगितले. त्यानंतर राष्ट्रपतींपासून तर पंतप्रधान मोदींपर्यंत सर्वच दिग्गजांनी दिदींना श्रद्धांजली वाहिली.

पंतप्रधान मोदींनी आपल्या भावना व्यक्त केल्या. ते म्हणाले, ''लता मंगेशकर यांच्या निधनाने झालेलं दु:ख शब्दांच्या पलिकडे आहेत. लता दिदी आपल्याला सोडून गेल्या. त्यांच्या जाण्याने देशात मोठी पोकळी निर्माण झालीय, ती भरून काढता येणार नाही. येणाऱ्या अनेक पिढ्यांना त्या कायम स्मरणात राहतील. लता मंगेशकर यांच्या आवाजात लोकांना मंत्रमुग्ध करण्याची अतुलनीय अशी क्षमता होती.''