राष्ट्रवादीचे नेते आणि विरोधी पक्षनेते अजित पवार कायमच आपल्या आक्रमक, सडेतोड बोलण्यातून ओळखले जातात. ते कायमच विरोधी नेत्यांवर आपल्या आक्रमक शैलीत कोंडीत पकडताना दिसून येतात. परंतु यावेळी त्यांची एक वेगळीच झलक दिसून आली आहे. आजपासून राज्य विधिमंडळाचे हिवाळी अधिवेशन सुरू झाले आहे. यावेळी सभागृहाबाहेर अजित पवारांचं वेगळं रूप पाहायला मिळालं आहे.

अधिवेशनासाठी सत्ताधारी आणि विरोधक नागपूरमध्ये हजर झाले आहेत. यावेळी अजित पवार आणि सहकारमंत्री अतुल सावे समोरासमोर आले. तेव्हा अजित पवार आणि त्यांच्यातील संभाषण आजचा चर्चेचा विषय ठरत आहेत.

जेव्हा अतुल सावे आणि अजित पवार समोरासमोर आले तेव्हा अजित पवार आपल्या खास अंदाजात अतुल सावे यांना म्हणतात की, "सावे साहेब तुम्ही मंत्री झाल्यापासून तुम्ही इतके बदलला आहात की, मी देवेंद्रजींना अनेकदा सांगतो की, सावे साहेबांना सांगा इतकं तुटक तुटक नसतं राहायचं. सत्ता येत असते, सत्ता जात असते. माणसं जोडायची असतात. त्यावर अतुल सावे म्हणतात की तुम्हाला माहीत आहे माझा स्वभाव कसा आहे ते." त्यांचा हा व्हिडिओ सोशल मिडियावर दिसून येत आहे.

राज्य विधिमंडळाचे हिवाळी अधिवेशन आजपासून सुरू झाले आहे. महत्वाच्या विविध मुद्दय़ांवरून विरोधकांनी राज्य सरकारला घेरण्याची तयारी केली आहे, तर त्यांना सडेतोड उत्तर देण्याची सरकारची तयारी केली आहे. अशातच सभागृहाबाहेर दिसणारे हे दृश्य दिसून आले आहे. सत्ता येते अन् सत्ता जाते, माणसं जोडायची असतात असा सल्ला अजित पवार यांनी मंत्री अतुल सावेंना दिला आहे.