पुणे- बाबासाहेब पुरंदरे १०० व्या वर्षात पदार्पण करत आहेत. यावेळी त्यांच्या सत्कारासाठी कार्यक्रमाचे आयोजन करण्यात आले. पंतप्रधान नरेंद्र मोदी यांनी व्हर्च्युअल पद्धतीने उपस्थिती लावत बाबासाहेब पुरंदरेंना शुभेच्छा दिल्या. शिवाजी महाराजांचा इतिहास जनतेसमोर पोहोचवण्यासाठी त्यांनी केलेलं काम अतुलनीय असल्याचं मोदी म्हणाले. पंतप्रधान मोदी यांनी यावेळी बोलताना छत्रपती शिवाजी महाराज यांच्याविषयी गौरवोद्गार काढले. शिवाजी महाराज भारताच्या इतिहासाचे शिखर पुरुष असल्याचं ते म्हणाले.

"छत्रपती शिवाजी महाराज भारताच्या इतिहासाचे शिखर पुरुष आहेत. महाराज नसते तर भारताची अवस्था काय असती? याची कल्पना करवत नाही. शिवाजी महाराजांचे स्वराज्य सर्वांनाच अनुकरणीय आहे. आपला भविष्य, वर्तमान, भूतकाळ महाराजांनी प्रेरित आहे. शिवाजी महाराज नसते कर काय झालं असतं? शिवाजी महाराजांशिवाय भारताच्या गौरवाची कल्पना करणे अवघड आहे. शिवाजी महाराजांचे हिंदवी स्वराज, नौसेनेचा वापर, जलप्रबंध, अत्याचाराला विरोध प्रशासनाचे अप्रतिम उदाहरण आहे, असं मोदी म्हणाले.

पंतप्रधान मोदी यांनी मराठीतून बाबासाहेब पुरंदरेंना शुभेच्छा दिल्या. २०१९ मध्ये देशाने बाबासाहेबांना पद्मविभूषण पुरस्कार देऊन सन्मानित केले. २०१५ मध्ये तत्कालीन महाराष्ट्र सरकारने त्यांना महाराष्ट्र भूषण दिले, मध्य प्रदेशच्या शिवराज सिंह चौहान सरकारने त्यांना कालिदास पुरस्कार दिलाय. छत्रपती शिवाजी महाराजांबाबत त्यांच्या मनात इतकी भक्ती उगाच नाही. त्यांचे जीवन अनुकरणीय असे आहे, असं मोदी म्हणाले.

बाबासाहेबांनी आझाद भारताच्या पिढीला महाराजांच्या रुपाची ओळख करुन दिली. त्यांचे लेखन आणि पुस्तकातून शिवाजी महाराजांची अतूट श्रद्धा दिसते. महाराजांच्या कथा सांगण्याची त्यांची शैली आणि शब्द अतुलनीय आहे. आपल्या कथांमधून ते महाराज कालीन प्रसंग जीवंत करतात. चार दशकांपूर्वी बाबासाहेब पुरंदरेंचे कार्यक्रम अहमदाबादमध्ये आयोजित केले जात होते. त्यावेळी मी तिथे उपस्थित राहायचो. जाणता राजाच्या प्रारंभिक काळात ते पाहण्यासाठी मी पुण्यात आलो होतो. त्यांनी इतिहास प्रेरणेसह पोहचवण्यासाठी प्रयत्न केले. खरा इतिहास पोहोचवण्याची गरज आहे. ते काम बाबासाहेब पार पाडत आहेत, असंही मोदी म्हणाले.