मुंबई : आमदार राहुल कुल यांच्या कथित साखर कारखाना घोटाळाप्रकरणी राज्य सरकारनं त्यांना आज क्लीनचीट दिली. या प्रकरणाचे पुरावे खासदार संजय राऊत यांनी गृहमंत्री देवेंद्र फडणवीस यांच्याकडं सुपूर्द केले होते, त्यामुळं क्लीनचीटनंतर राऊत यांनी संताप व्यक्त केला असून फडणवीसांवर निशाणा साधला आहे. (Rahul Kul clean cheat by Govt Sanjay Raut attack on Devendra Fadnavis)

राऊत म्हणाले, "स्वतःच्या लोकांना धुऊन काढायचं, क्लीनचीट द्यायची हा यांचा जुना उद्योग आहे. मी सर्व पुरावे गृहमंत्र्यांकडे पाठवले आहेत. पण सर्व चौकशी समित्या यांच्याच आहेत. पण काल दौंड कोर्टानं नामदेवराव ताकवणे यांच्या तक्रारीनुसार सीआरपीसी २०२ नुसार कारखान्याचे चेअरमन, व्हाईसचेअरमन, लेखापरिक्षक यांच्या चौकशीचे आदेश दिले आहेत. त्यात तथ्य असल्याशिवाय कोर्ट असे आदेश देणार नाही"

गृहमंत्र्यांना या प्रकरणाची पूर्ण माहिती नाही

"यातील जे घोटाळे आहेत त्याची सविस्तर माहिती मी आधी गृहमंत्र्यांकडं दिली. त्यानंतर सीबीआयकडे आणि ईडीकडं पाठवली आहे. पण ज्या अर्थे यांना क्लीनचीट दिली जात असेल तर आम्ही जे आरोप करतो की भाजप हे गुन्हेगारांचे गुन्हे धुऊन काढणारं 'वॉशिंग मशिन' आहे ते खरंच आहे.

गृहमंत्र्यांनाच हा विषय पूर्ण माहिती नाही. त्यांना केवळ हेच माहिती आहे की, भ्रष्टाचार करणारा आपल्या पक्षातला माणूस आहे आणि आपण त्याला वाचवलं पाहिजे," अशा शब्दांत राऊतांनी फडणवीसांवर निशाणा साधला.

आमचं सरकार आल्यावर कारवाई

ही अत्यंत गंभीर बाब आहे. या कारखान्याचे जे शेतकरी सभासद आहेत त्यांच्याशी बोला. यामध्ये शेतकऱ्यांचे ५०० कोटी रुपये थेटपणे चोरलेले आहेत, आणि आता सरकार यांना क्लीनचीट देत आहे. उद्या आमचं सरकार येईल तेव्हा त्यांच्यावर आम्ही कारवाई करु, अशा शब्दांत राऊतांनी इशाराही दिला.

विखेंना झाकीर नाईकनं पैसा पुरवला

दादा भुसे यांनी १७८ कोटी रुपयांचा घोटाळा केला आहे. अब्दुल सत्तार, राधाकृष्ण विखे पाटील हे देखील मनी लाँड्रिंगमध्ये अडकलेले आहेत. विखे पाटलांच्या संस्थेला फरार इस्लामिक स्कॉलर झाकीर नाईककडून साडे चार कोटी रुपये मिळाले आहेत.

हाच गुन्हा इक्बाल मिर्ची, दाऊद इब्राहिम यांच्याकडून काही व्यवहार झाल्यानं नवाब मलिक आता तुरुंगात आहेत. मग झाकिर नाईक याच्याकडून पैसे मिळालेले लोक मंत्रिमंडळात कसे? स्वतः विखे सांगतात की आम्हाला चार कोटी नाही अडीच कोटीच मिळाले आहेत, म्हणजे हे सत्य आहे, अशा शब्दांत राऊतांनी विखेंनाही टार्गेट केलं.