नवीन संसद भवनाचे आज,२८ मे रोजी पंतप्रधान नरेंद्र मोदी यांच्या हस्ते उद्घाटन करण्यात आले.भव्य सोहळा देशभरातील नेते सहभागी झाले होते. दरम्यान या नव्या संसद भवनाच्या उद्घाटन सोहळ्यावर देशातील २१ विरोधीपक्षांनी मात्र बहिष्कार टाकला होता. आता मनेस अध्यक्ष राज ठाकरे यांनी ट्वीट करत याबद्दल प्रतिक्रिया दिली आहे.

नवीन संसद भवनाच्या उद्घटन सोहळ्यावरून सत्ताधारी पक्ष आणि विरोधकांमध्ये आरोप-प्रत्यारोप करण्यात आले.यावरून राज ठाकरे यांनी खंत व्यक्त केली आहे."आज देशाच्या नवीन संसदभवनाचं लोकार्पण झालं. संसदभवन हे देशातील लोकशाहीचा आधारस्तंभ, त्याचं औचित्य आणि गांभीर्य नव्या वास्तूत पण टिकून राहू दे."

"ह्या सोहळ्याला वादाची किनार उगाचच लागली, ती लागली नसती तर बरं झालं असतं. असो, ह्या वास्तूच्या निर्माणासाठी आणि ही वास्तू ज्या लोकशाहीचं प्रतीक आहे ती लोकशाही टिकवण्यासाठी आजपर्यंत झटलेल्या प्रत्येकाचं मनापासून अभिनंदन. भारतीय लोकशाही चिरायू होवो." असे ट्वीट राज ठाकरे यांनी केलं आहे.

नवीन संसद भवनाचे उद्घाटन राष्ट्रपतींच्या हस्ते व्हावे ही मागणी करत विरोधकांकडून मोठ्या प्रमाणात विरोध करण्यात आला. अखेर पंतप्रधान नरेंद्र मोदी यांनी रविवारी (२८ मे) संसदेच्या नव्याने बांधलेल्या इमारतीचे उद्घाटन केले.

त्याआधी, पंतप्रधान मोदींनी लोकसभा अध्यक्षांच्या आसनाजवळ ऐतिहासिक राजदंड 'सेंगोल' देखील बसवला. संसद भवनाच्या उद्घाटनानंतर, पंतप्रधान मोदी नवीन संसदेच्या आत लोकसभेत पोहोचले, जिथे त्यांनी एक विशेष स्मारक टपाल तिकीट आणि ७५ रुपयांचे नाणे देखील जारी केले. यावेळी विविध पक्षांचे खासदार आणि प्रतिष्ठित नागरिक उपस्थित होते.