मागील काही दिवसांपासून राज्यात राज्यसभेच्या निवडणूकीची धामधूम अखेर संपली आहे. राज्यसभेच्या निवडणुकीचा निकाल लागला असून शिवसेनेच्या संजय पवार यांचा या निवडणूकीत पराभव झालेला आहे. या निकालानंतर आरोप प्रत्यारोप केले जात आहेत. दरम्यान अपक्ष आमदार देवेंद्र भुयार यांच्या उल्लेखावरून राजू शेट्टी यांनी संजय राऊतांवर निशाणा साधला आहे. (Raju Shetti critisize shivsena sanjay raut over mla Devendra Bhuyar rajya sabha election result 2022)

शिवसेनेचे नेते संजय राऊत यांनी बोलताना भाजपवर जोरदार टीका केली, यामध्ये त्यांनी राज्यसभेच्या निवडणुकीत भाजपकडून घोडेबाजार झाल्याचा आरोप केला. त्यांनी बहुजन विकास आघाडीसह अपक्ष आमदार देवेंद्र भुयार आणि संजय शिंदे यांची नावे घेत हे आरोप केले आहेत.

राऊतांनी देवेंद्र भुयार यांचा उल्लेख राजू शेट्टी यांच्या स्वाभिमानी पक्षांचे आमदार असा केल्याने राजू शेट्टी संतापले आहेत, त्यांनी फेसबुकवर यासंबंधी पोस्ट लिहीत स्पष्टीकरण दिले आहे. "संजय राऊतजी ज्या आमदाराचा उल्लेख तुम्ही स्वाभिमानीचा म्हणून केलेला आहात त्याच्या बुडावर लाथ घालून पुर्वीच आम्ही हाकालपट्टी केलेली आहे. तेंव्हा कृपा करून स्वाभिमानीचा आमदार असा उल्लेख करू नका," असे लिहीले आहे. इतकेच नाही तर त्यांनी, "तो असा का वागला या प्रश्नाच उत्तर तुम्हाला अजित पवार व जयंत पाटील देतील." असेही शेट्टी म्हणाले आहेत.

संजय राऊतांनी "राज्यसभा निवडणुकांत आमचा पराभव झाला पण भाजपचा मोठा विजय झाला नाही. आम्ही व्यवहारात पडलो नाही आणि आम्ही व्यापारही केला नाही तरी आम्हाला पहिल्या पसंतीची ३३ मते मिळाली आहेत. ज्या कुणी गद्दारी केली त्यांची यादी आमच्याकडे आहे. ज्यांनी शब्द देऊन दगाबाजी केली त्यांची नाव आमच्याकडे आहेत पण ठीके पाहून घेऊ." असा इशारा राऊतांनी दिला आहे.