मुंबईः सकाळ माध्यम समूहाला दिलेल्या मुलाखतीमध्ये अजित पवार यांनी मुख्यमंत्रीपदाबाबत विधान केलं होतं. त्याला केंद्रीय राज्यमंत्री रावसाहेब दावने यांनी उत्तर दिलं आहे.

सकाळ माध्यम समूहाला दिलेल्या मुलाखतीत, आता २०२४ ला मुख्यमंत्रीपदावर तुम्ही क्लेम करणार का? असा प्रश्न विचारला असता, त्यावर अजित पवार म्हणाले की, क्लेम २०२४ ला का? आताच करणार, असं म्हणून अजित पवारांनी सूचक विधान केलं. त्यांच्या या विधानामुळे एकच हशा पिकला होता.

पवारांच्या या विधानावरुन आता प्रतिक्रिया येत आहेत. केंद्रीय राज्यमंत्री रावसाहेब दानवे म्हणाले की, मुख्यमंत्रीपदावर दावा करणं वेगळं आणि बहुमत असणं वेगळं. ते बहुमताच्या बाजूने आले किंवा त्यांना बहुमत मिळालं तर ते मुख्यमंत्री होऊ शकतात.

दानवे पुढे म्हणाले की, अजित पवार हे धडाडीचे नेते आहेत. ते जे बोलतात त्याकडे राज्याचं लक्ष असतं. मात्र मुख्यमंत्री होण्यासाठी त्यांना बहुमत लागेल, हे नक्की.

हेही वाचाः संतुलित आहारातून रोखा फॅटी लिव्हरचा आजार

दरम्यान, मुलाखतीमध्ये एकनाथ शिंदेंना टोला लगावताना अजित पवार म्हणाले, "जसंजसं लोकांना अनुभव येतात, माहिती मिळत जाते, तेव्हा तुम्हाला ठासून तुमची भूमिका मांडता येते. एखाद्याला माहिती नसेल तर इतकी भंबेरी उडते मी मी म्हणणारे देशाचे पंतप्रधान मुर्मु म्हणण्याची वेळ येते..किंवा MPSC विषय निवडणूक आयोगाकडे आहे का माहित नसतं. हे अनुभवातून शिकत जातील मग तयार होतील.. तयार होईपर्यंत पद जाईल."

यावेळी अजित पवार यांना विचारण्यात आलं की, २००४ मध्ये राष्ट्रवादीला मुख्यमंत्रीपदाची संधी होती. त्यावर अजित पवार म्हणाले की, २००४ मध्ये काँग्रेसपेक्षा आमच्या जागा अधिक आल्या होत्या. त्यावेळी आम्हाला संधी होती. तेव्हा आम्ही आर.आर. पाटलांना विधीमंडळ नेता म्हणून निवडले होते. त्यामुळे सहाजिकच मुख्यमंत्री आर.आर. पाटील झाले असते. मात्र हे दिल्लीतून ठरलं होतं, असंही ते म्हणाले.