पुणे : मंत्र्यांना निर्णय घेण्याचं स्वातंत्र्य नसणं, या संस्कृतीची भाजपच्या नेत्यांना सवय आहे. पण पंतप्रधानाच्या बैठकीला राज्याचे आरोग्यमंत्री हजर असताना, मुख्यमंत्री का उपस्थित राहिले नाहीत अशी टीका करणाऱ्या या नेत्यांनी हे केंद्राचं नाही तर महाराष्ट्राचं सरकार (Maharashtra Government) आहे, हे लक्षात घ्यावं, असा टोला आमदार रोहित पवार (Rohit Pawar) यांनी भाजपच्या नेत्यांना आज लगावला आहे. ते आपल्या ट्विटमध्ये पुढे म्हणतात, की तौक्ते वादळाच्या वेळेस आदरणीय पंतप्रधानांनी शेजारच्या राज्याची पाहणी करून त्यांना तातडीने हजार कोटी रुपयांची मदत केली आणि त्याचवेळी महाराष्ट्राला मात्र सापत्न वागणूक दिली.(Rohit Pawar Criticize BJP Leaders For Attacking Chief Minister Uddhav Thackeray)

त्यावेळी मूग गिळून गप्प बसणारे भाजप (BJP) नेते आज मात्र चढाओढीने मुख्यमंत्र्यांवर टीका करतात, हे आश्चर्यकारक आहे. केवळ केंद्रीय नेतृत्वाला खूष करून त्यांची मर्जी सांभाळण्याची राजकीय भूमिका भाजपच्या नेत्यांकडून नेहमीच घेतली जाते, अशी टीका रोहित पवार यांनी केली. पण या राज्याचे आपण देणे लागतो, या भूमिकेतून कधी तरी राज्याच्या हिताची भूमिका घेण्याचं शहाणपण ज्या दिवशी त्यांना येईल, तो राज्यासाठी सुदिन असेल, असा आशावाद त्यांनी व्यक्त केला आहे.

काही दिवसांपूर्वी पंतप्रधान नरेंद्र मोदी यांनी देशातील विविध राज्यांच्या मुख्यमंत्र्यांबरोबर कोरोना स्थितीवर बैठक घेतली होती. यावेळी राज्याचे मुख्यमंत्री उद्धव ठाकरे उपस्थित नव्हते. त्याऐवजी आरोग्य मंत्री राजेश टोपे हे उपस्थित होते. यावरुन सध्या भाजपकडून राजकारण केले जात आहे. काहींनी तर आदित्य ठाकरे यांना मुख्यमंत्री करण्याची मागणी केली आहे.