मुंबई : भाजप नेते किरीट सोमय्या यांनी मंत्रालयात जाऊन कर्मचाऱ्यांच्या खुर्चीवर बसून फाईल तपासल्याने खळबळ उडाली आहे. या प्रकरणी मुख्यमंत्र्यांनी (CM Uddhav Thackeray) घेतली दखल घेतली असून मुख्य सचिव यांना चौकशीचे आदेश दिले आहेत. यानंतर विरोधी पक्षनेते देवेंद्र फडणवीस (Devendra Fadanvis) आक्रमक झाले असून त्यांनी महाविकास आघाडी सरकारवर कडाडून टीका केली. 'मविआ सरकारचे डोके ठिकाणावर आहे का?' असा सवालही त्यांनी केला. दरम्यान त्यांच्या या सवालावर कॉंग्रेस नेते सचिन सावंत (Sachin Sawant) यांनी प्रतित्त्युर दिले आहे.

ते म्हणतात, देवेंद्र फडणवीस तुमच्या कार्यकाळात RTI तून माहिती मिळवण्यासाठी माहिती आयुक्तांपर्यत जावे लागत होते. आता अर्ज करुन राजरोसपणे पाहता येते. गोपनीय माहिती मंत्रीमंडळ टिप्पणी शासनाला न देता सोमय्यांना कशी मिळाली? CBI च्या PE अहवालाबाबत अनिल देशमुखांच्या वकीलाला एक व सोमय्यांना दुसरा न्याय कसा? असा उलट सवाल त्यांनी केला आहे.

दरम्यान, काल किरीट सोमय्या मंत्रालयातील नगर विकास खात्यात गेले असता तिथे ते शासकीय कर्मचाऱ्याच्या खुर्चीवर बसले आणि त्यांनी काही फाईल्स बघितल्या. फाईल्स चेक करतानाचे किरीट सोमय्या यांचे हे मंत्रालयातील फोटो व्हायरल झाले आहेत. यानंतर मुख्यमंत्र्यांनी चौकशी आदेश दिले. यावरून देवेंद्र फडणवीस यांनी मविआ सरकारचे डोके ठिकाणावर आहे का? माहिती अधिकारात फाईलचे निरीक्षण करण्यासाठी गेले तर त्यासाठी थेट माहिती मागणार्‍यालाच नोटीस! या अक्कलशून्य सरकारने संपूर्ण लोकशाहीच पायदळी तुडविली आहे. किरीट सोमय्यांना नोटीस कसली देता, ही नोटीस द्यायला सांगणार्‍या बोलवित्या धन्यावर कारवाई करा!, अशी प्रतिक्रिया दिली होती.