मुंबई : राज्यभरात गाजत असलेले म्हाडा(Mhada),आरोग्य विभाग(Health Department)आणि शिक्षक पात्रता (TET)या परीक्षांच्या पेपर फुटीमुळे विरोधक आक्रमक झाले आहेत. याप्रकाराची चौकशी ‘सीबीआय’मार्फत व्हावी यासाठी न्यायालयात जाणार असल्याचा इशारा विरोधी पक्षनेते देवेंद्र फडणवीस(Devendra Fadanvis) यांनी आज विधानसभेत दिला. त्यानंतर रयत क्रांती संघटनेचे प्रमुख व आमदार सदाभाऊ खोत (Sadabhau Khot) यांनी ही महाविकास आघाडीला धारेवर धरले आहे. महापोर्टल उगाच रद्द केल नाही, नाहीतर पेपर फोडायला कसे मिळाले असते? अशी टीका त्यांनी ट्विट करत केली आहे.

परीक्षा होण्यापूर्वी पेपर फुटीमुळे प्रामाणिकपणे स्पर्धा परीक्षेचा अभ्यास करणाऱ्या विद्यार्थ्यांमध्ये संताप व्यक्त होत आहे. १५ डिसेंबरला याप्रकरणात पुण्यातील जी. ए. सॉफ्टवेअर कंपनीचा संचालक डॉ. प्रीतिश देशमुख याला अटक केली होती. त्याला साथ देणाऱ्या आणखी दोघांनाही ताब्यात घेण्यात आले होते.

दरम्यान, आज देवेंद्र फडणवीस यांनी विधानसभेत इशारा दिला. परीक्षा घेणाऱ्या कंपन्या मुळातच अपात्र आणि काळ्या यादीत टाकलेल्या होत्या. तरीही त्याच कंपन्यांना परीक्षाची कंत्राटे दिली. एवढेच नव्हे तर ‘टीईटी’(tet)च्या गैरप्रकारात तर मंत्र्यांचे काही निकटवर्तीयांचाच समावेश आहे. पुणे पोलिसांनी या प्रकरणात चांगला तपास केला तर त्यांचे हात लवकरच बांधले जाणार आहेत, असा दावाही फडणवीस यांनी केला.