कोल्हापूर : राज्य मंत्रिमंडळाने सर्व दुकानांच्या पाट्या मराठीत लावणे बंधनकारक असल्याचा निर्णय घेतल्या नंतर राजकिय वर्तुळात टिका-टिप्पणीला सुरुवात झाली आहे. याआधी औरंगाबादचे (Aurangabad) खासदार इम्तियाज जलील यांनी महाविकास आघाडीवर टीका केली होती. तर आज रयत क्रांती संघटनेचे प्रमुख व आमदार सदाभाऊ खोत यांनी राज्य शासनावर ताशेरे ओढले आहेत. त्यांनी सोशल मीडियावरुन हल्लाबोल केला आहे.

ते म्हणाले, अहो दुकानावर मराठी पाट्या हव्यात पण मराठी शाळा नको! ह्याच सरकारनं प्राथमिक शिक्षण मराठीतून घेतलं म्हणून मराठी शिक्षक उमेदवारांना अपात्र ठरवलं.मराठीची पोकळ कळकळ जरा समजून घ्याच! हे मराठीचं दुटप्पी राजकारण आहे. असा घणाघात सदाभाऊ खोत (Sadhabhau Khot) यांनी ठाकरे सरकावर केला आहे.

मराठी भाषा दिनाच्या पूर्वसंध्येला ज्येष्ठ तज्ञ विलास पाटणे यांनीही मत व्यक्त केले होते. ते म्हणतात, मराठी विषय सक्तीपेक्षा अस्मितेचा करा. राज्यकर्त्यांमध्ये मराठी ही लोकभाषा, व्यवहारभाषा आणि ज्ञानभाषा म्हणून टिकावी यासाठी प्रामाणिक प्रयत्न केले नाहीत. केवळ मराठी सक्तीच्या आणि पाट्या बदलण्याच्या कार्यक्रमातून राजकारण होईल, परंतु परिस्थिती सुधारणार नाही असेही ते म्हणाले होते.

इम्तियाज जलील (Imtiaz Jaleel) म्हणाले, असे का होते की जेव्हा-जेव्हा निवडणुका जवळ येतात तेव्हा तुम्ही मराठी बोर्ड, कर्नाटक सीमा वाद, मराठी अस्मिता इत्यादींबद्दल बोलतात. लोक मुर्ख नाहीत की त्यांना या नौटंकी समजत नाहीत. मराठी पाट्या लावून मराठी तरुणांना नोकऱ्या देणार का? हा एक मिलियन डाॅलरचा प्रश्न आहे. अशी खोचक टीका त्यांनी केली होती.